踏入羊年之後港股未威過，噚日終於出現一次較似樣反彈，恒指低開高收，以全日高位9232收市，升81點，不過成交就縮至50億元，升市成交縮，令人覺得動力唔多夠。
噚日藍籌股升勢頗全面，稍為行先嘅滙豐（005）、和黃（013）及新地（016）均升至10日線阻力，但以勢論勢，3股就算升穿10日線，再升空間亦有限。
恒指走勢亦與3股相近，昨升近10日線阻力9252，就算升得穿，估計反彈止於9400，甚至可能升至9330已無力再上，趙飛雲等反彈造淡等到頸都長，今次可能有機會再上車，可伺機在9330至9400買恒指Put輪短炒一轉。
不過，話說回頭，恒指近期在9000水平韌力十足，美股大散對佢亦影響唔大，如果大家睇吓恒指月線圖，就知道呢個係重要關口位，硬淨得有道理，因此，恒指Put輪就算在9400附近上到車，一旦跌至9100至9000附近亦要睇緊啲，如果跌唔穿就要睇位獲利，如果跌穿則相當和味，有機會下試去年10月低位8772。另外，恒指確認升穿9400，Put輪需要先止蝕。
大市陰陽怪氣，炒輪搵食艱難，好彩羊年頭威頭勢買中意科（943），隻股噚日先高後低，跌1.2%，收0.241元，走勢雖然唔多好睇，但急升後出現整固屬正常，後市可看好，可將止賺位推上0.23元，繼續持貨上望。
趙飛雲