特首董建華及三司九局長同幾十位行政、立法會議員噚日喺立法會宴會廳食開年飯，唔知係咪巧合，席上嘅遊戲、笑話及飯後禮物，都暗示港人要預備勒緊褲頭過日子。
賓客玩「精打細算『開年何價』競猜遊戲」時，要估五款開年餸菜：雞、魚、燒肉、齋、菜共值幾多錢。由於財政司司長梁錦松舊年估計嘅公務員減薪幅度，同實際差太遠，幾十個記者中只有兩個投票估阿松會贏。點知阿松估183元，同答案182元只差一蚊，勇奪冠軍威番次。
不過呢個只係遊戲，一眾高官議員當然唔會食只值百多元嘅菜色啦！睇睇餐牌，佢哋食嘅係鴻星酒家提供嘅乳豬拼熏鱔、鮑魚羹、星斑球等佳餚。
賓客食到飽飽，最後收到一包消滯茶。范太講笑話，有人認為有「消赤茶」更加好。而坐阿松隔籬嘅李華明患上腸胃炎，只能食餅，同阿松講笑話係預定應付日後嘅「緊日子」。阿松竟然話「有冇咁好嘅餅乾你食？」
八方留意到「孖葉」缺席。葉澍堃身在海外，葉劉淑儀因事忙冇到，係唔係忙緊將二十三條趕及今提交行會？
～乳豬件拼法國熏烟鱔（鴻運當頭展繽紛）
～鮑魚三絲羹（錦繡前程共歡欣）
～紅糟汁小黃瓜炒帶子（金玉輝煌耀香江）
～津白卷拼星斑球（麒麟獻瑞福滿堂）
～江南百花雞（百業興旺創佳境）
～上湯鳳尾雲吞（鳳鳴展翅享豐盈）
～南瓜八寶飯（香米滿盤賀豐收）
～合時生果拼盆（美果共嚐樂無憂）
（圖）「預算案佢（阿松）估數字都會咁準！」 陳亮華攝
傳真︰2623-9278
電郵︰