日產350Z（即FairladyZ）自推出以來，一直成為各地車迷嘅追捧對象；而嚟緊四月響美國紐約舉行嘅紐約國際車展（NewYorkInternationalAutoShow）上，廠方更會展出全新、並將於今年夏季推出嘅350ZRoadster開篷跑車，相信勢必惹來不少車迷嘅注視目光。
雖然廠方暫時未有公布關於350ZRoadster嘅詳細資料，但從相片中可以睇到，新車造型與現有雙門硬頂版一樣，不過就改用上電動軟篷頂設計，令賣相更增添有一份誘人魅力。至於車廂方面，則仍然保留有雙座位設計，而一雙座椅更屬桶形配搭，承托力十足，座椅背後更備有防滾架，以保障乘客安全。另外，一般相信新車仍然會以一台3.5公升V6引擎作動力核心，馬力及扭力輸出分別係280匹及37.0kgm，從而令新車有更強勁嘅性能表現。若你有興趣或想知多啲關於呢部350ZRoadster嘅資料的話，就要留意我哋日後嘅報道喇！