成日飲醉酒嘅曾志偉，去到加拿大溫哥華都一樣係咁飲酒，話說早幾晚王賢誌個老竇王忠桐喺溫哥華著名嘅春秋火鍋請食飯，亦即係早排謝霆鋒同嫲嫲去過嗰間火鍋店。
嗰晚除咗志偉之外，重有姜大偉、李琳琳、秦沛、陳慧珊、錢嘉樂同李珊珊等，成班人一邊打邊爐一邊飲紅酒傾偈，好鬼熱鬧。
志偉愈飲愈高興，四圍向人隊酒，連秦沛個十五歲嘅囡囡都唔肯放過，猛咁叫人飲酒，秦沛當然唔畀個女飲，但志偉好抵死咁寸秦沛話：「你十年前都成日叫啲十幾歲嘅妹妹仔飲酒㗎啦！」激到秦沛死死吓。
跟住志偉又話王忠桐個仔王賢誌有樣嘢好唔掂，就係唔飲得，搞到平時好好脾氣嘅王賢誌，都沉唔住氣反駁志偉話：「我未必係唔飲得，可能我好飲得，只不過我從來唔飲啫！」講完之後就喺志偉面前飲咗兩杯酒落肚。而志偉到最後係醉到起唔到身，要人抬走。
英皇三T之一鄭希怡（Yumiko）同蔣雅文（Mandy）等，前晚喺灣仔出席韓片《他喜歡的是妳》首映。
Yumiko好鍾意睇韓片，佢話：「我都好鍾意呢套片嘅女主角（申恩慶），可惜佢冇嚟。」Yumiko又話鍾意電影《我的野蠻女友》嘅男主角車太賢，佢話：「佢儍儍哋，任抦都唔嬲，佢個樣雖然似Eason（陳奕迅），但Eason就唔可以任抦。」
蒙嘉慧噚日接受商台訪問，講及早前喺屋企暈倒嘅傷勢，愛靚嘅佢只係問咗醫生下巴同後腦縫針嘅數目，反而割完盲腸要縫幾多針就唔知。佢話：「做呢行個樣好緊要嘛，不過今次覺得屋企人真係好錫我，令我好感動。𠵱家我氣力冇咁好，但係遲多兩日會為《陀槍師姐IV》復工。」
有份拍《老鼠愛上貓》嘅李冰冰噚日喺天后出席記者會時，勁讚劉德華好，重話自己鍾意嘅人唔鍾意自己。問佢鍾意邊個？佢就話：「我同華哥講我好鍾意佢，佢就話冇辦法，太多人鍾意我啦！」
再問冰冰會否傷心？佢笑住話：「唔會，因為鍾意一個人係冇理由，亦唔需要有結果。」
成龍喺澳洲坎培拉嘅屋企早前爭啲俾大火波及，由於呢次大火令到唔少人喪失家園，所以澳洲方面發起籌款晚宴賑災，每張餐券要澳幣一百五十元，即約港幣七百蚊，重請咗成龍出席呼籲賑災。
消息指出，有關賑災籌款活動係由坎培拉首席廳長發起，嗰晚重會有唔少澳洲歌星同運動員出席。
