威爾斯球星傑斯響聯賽勇戰受傷，仍然堅持出席周中國際友賽，我求大俠忍唔住要讚佢夠晒專業。
事實上傑斯並無話自己係隊中大哥，就因為有啲傷而唔出席國際賽事，佢咁做相信可以令隊波更有士氣，亦能令隊友間更團結！
相反意大利嘅韋利又話因傷退隊，之前幾次國際友賽又係咁，真係啱得交關？定係專業態度嘅問題呢？
講開國際米蘭，韋利副車卡隆響對里賈納時射入十二碼之前，曾經讓過畀巴迪斯圖達主射，但後者亦好禮貌咁鼓勵佢自己射番，並無擺起大哥架子。一個咁識尊重前輩，一個又咁識禮讓提攜，更加將韋利比下去。
噚晚巴塞迎戰畢爾包嘅上半場踢得有聲有色，最後領前兩粒；可惜賽前將拉素拼搏精神灌輸畀隊友，而且每次觸球都有喝采聲嘅蘇連下半場初段犯天條，輸粒十二碼，之後再輸罰球，最後巴塞只攞一分。我求大俠諗如果犯天條嗰個唔係高姿態嘅蘇連，對隊友影響冇咁大，但係講到尾，巴塞球員啲比賽心理真係要調校一吓至得。
阿仙奴前鋒伯金響周日聯賽對紐卡素時，憑住「經驗」令對方入球功臣羅拔被罰離場。不過賽後伯金就被指為「使詐」令紐卡素踢少個，其實當時羅拔被罰第二面黃牌，除咗因為阻住伯金開罰球之外，佢攬住伯金嗰下，以及球證吹雞後仍兜腳省個波去羅倫度，都值得受罰，怪只怪羅拔EQ低囉！
我求大俠成日都話，能夠影響一場比賽戰果及紀錄嘅，有時係需要一啲「異數」。好似之前阿仙奴保持住成三十場超聯不敗嘅紀錄，就係俾神童朗尼一腳搞掂；周日德甲聯，拜仁門將簡尼完場前俾漢堡嘅高原直泰射垮，終止咗八百零二分鐘刷新自己保持嘅聯賽不失球紀錄，兼令球隊再失分，上盤客慘叫……
噚日睇NBA明星賽，見到「波神」老人家，喺加時賽最後一射穿針時簡直興奮到手舞足蹈，一來替佐敦高興，二來自己捧東岸場，重唔一箭雙鵰！點鬼知謝美恩奧尼爾，喺完場前foul咗失晒平衡嘅拜恩嘅三分波，俾西岸靠罰球三中二追平，最後重贏埋波；唔單止累到東岸捧場客見財化水，重累埋波神將個MVP拱手相讓！