噚日下午嘅會展好熱鬧，因為民政事務局請咗十八區及各界人士合共三千五百幾人，出席新春酒會，連稀客人權監察嘅羅沃啟都有出席，嚟搵何志平問吓平機會將來嘅命運，係咪會好似傳聞所講變成政府官方機構一部份。
可惜噚日當何局長迎面行過時，羅沃啟收到長途電話，就此錯失機會，非常揼心。
酒會上要揼心嘅唔只羅沃啟，重有民政事務局嘅常任秘書長李麗娟、副秘書長趙婉珠及署理民政事務總署署長王榮珍，佢哋竟然不約而同着到成身紅當當，直情好似三個利是封咁，加上同是紅色嘅布景板及紅地氈，三位女士無可避免「黐晒底」。趙婉珠解釋，一身紅係諗住香港經濟唔好，咪為香港沖吓喜囉。
（圖）李麗娟（右二）及王榮珍（右一）着到成個利是封咁，連特首都忍唔住望多兩眼。
傳真︰2623-9278
電郵︰