每年奧斯卡公布入圍名單之前，「金草莓電影大獎」提名名單都會搶先曝光，選出全年至差嘅電影同演員，我羅拉噚日已經收到新鮮出爐嘅「第二十三屆金草莓電影大獎」提名名單，由過氣樂壇小天后BritneySpears擔正嘅處女作《玉女半熟時》，一共獲得「最差影片」、「最差女主角」、「最差編劇」及「最差電影歌曲」等八個提名，真係俾佢玩晒！
不過今次嘅「金草莓」提名名單入面，重包括大導演佐治魯卡斯（GeorgeLucas）嘅《星戰前傳II複製人侵略》同麥當娜（Madonna）嘅《SweptAway》，呢兩部戲同《玉女半熟時》分「金」同味，齊齊獲七個提名，成為次熱門。而娜姐亦帶挈幫佢拍呢部「杰」作嘅老公基里奇（GuyRitchie）入圍「最差導演」一獎。娜姐除咗演技不濟，憑該片提名「最差女主角」同憑《新鐵金剛之不日殺機》提名「最差女配角」之外，佢為《不日殺機》所唱嘅主題曲《DieAnotherDay》，亦有份提名「最差電影歌曲」，真陰功。
至於九九年憑《一個快樂的傳說》獲奧斯卡影帝嘅羅拔圖貝尼尼（RobertoBenigni），佢主演嘅真人版《木偶奇遇記》，亦獲得六個提名，佢當然有份提名「最差男主角」啦！