本田部Fit（即港版Jazz）唔止響香港備受追捧，去年更打破多年東瀛本土紀錄，累積2002年全年銷量，竟然賣贏咗豐田Corolla，你都咪話唔厲害。相對下，由於港版Jazz走勢仍然強勁，故代理幾乎可以肯定，唔使加推1.5公升嘅Jazz型號；雖然呢款迷你CityCar前景唔使憂，惟本田過往兩大皇牌——Civic同Accord，銷量卻大不如前。早陣子，Accord經已推出全新版本，之不過代理遲遲未肯引入香港，除外傳代理對引入美版Accord前景不敢樂觀之餘，亞Mark聽聞另一個消息，就係話嚟緊亞太區出售嘅Accord車系，會以泰國為生產基地，因而包括香港在內嘅代理商，響新Accord生產線未見完全竣工前，都未能將Accord推出市面。
惟踏入羊年，泰國嘅生產線裝嵌完成後，有知情人士睇過部MadeinThailand嘅Accord，發覺部車嘅手工絕能媲美日本貨外，比較起舊有美國製嘅Accord更有過之而無不及。據知，遲吓正式抵港嘅新Accord，將會以一台2.4公升i-VTEC偈作主打，既有前後獨立恒溫冷氣、全車高級皮椅，又有電天窗、合金胎軨同軚盤遙控音響控制鍵等裝備；相信車價會較豐田Camry2.4更具競爭力，而首部Accord嘅Demo車經已響農曆年前抵港，若然萬事俱備的話，或許呢款新Accord有望提前跟香港車迷見面呢！