非常畀面鐵金剛，一早透過網上購票在UA金鐘的A院內揀選了大堂正中的位置，係全場最好嘅位置。千祈唔好遲入場，因為一開場嗰場滑浪戲實在精彩，加埋UA金鐘A院的大銀幕及上佳音響，都算幾冇得頂。滑緊嘅浪講緊係好似海嘯咁大嘅浪，聽講話全球只有十個人可以做到，有五個人肯做，最後揀咗三個人，令我疑惑嘅係究竟部攝影機點擺？若果係一路滑一路拍，一個大浪冚落嚟，豈不是渣都冇?!
陪襯片頭字幕的是麥當娜唱的主題曲與大量電腦特技畫面，較喜歡以往的片頭設計，這次太着重電腦特技而少了展示女性胴體的優美線條，電腦幾時會好睇得過女仔？
鐵金剛罕有地成為階下囚，被困了十幾個月，變了長毛賊，周身污糟臭崩崩，破壞了建立了幾十年的爾雅形象，就像是結了婚後看見老婆捲了髮卷踎在塔上塗腳甲一樣，有點冇癮。
片中有一個香港夜景的鏡頭，但用電腦做了大量手腳，若不是中銀大廈易認，好易走了眼。
曾江先生的演出正斗，尤其是一口英語講得嘞嘞聲，連廣東話也未咬得正的年輕一輩應好好借鏡。
全片最突出嘅係美國黑人女特務，基本上鐵金剛都係用嚟襯佢，相信不久將來呢位黑人女鐵金剛就會擔正，到時片頭就變成一班裸男搽晒油在震波，嘩，你睇埋我份！