特區政府咁多個高官入面，要數最天真爛漫嘅相信非小公主廖秀冬莫屬，好似佢噚日去立法會食完開年飯，同李國章、馬時亨一齊行出停車場時，俾記者截住傾兩句，點知說時遲那時快，另外兩位局長已經跳上架AM車，打算一齊返政府總部。
冬冬聽到有架車「蓬」一聲想開走，即時神經緊張大叫：「唉呀！我冇車坐！」佢馬上撇甩記者，跑去架AM車度，敲窗叫兩位局長畀佢上車，馬仔同李國章當然即刻縮埋一邊讓位畀佢啦。
點知架車開咗冇幾耐，停咗喺紅燈嘅時候，冬冬自己架AM9又嚟到，記者好心跑上前通知冬冬，點知佢又驚自己落車會俾記者圍攻，擾擾攘攘一輪，想落又唔落，結果喺司機踩油再開車之際，佢突然想打開車門，好彩冇乜意外，最後都成功「轉車」。
傳真︰2623-9278
電郵︰