美伊局勢愈來愈緊張，連中國亦撤走大使館人員，意味開戰機會愈來愈大。不過港股噚日反覆造好，以全日高位9232收市，升81點，成交50億元。大市似乎對開戰消息感到厭倦，所以先來一個技術性反彈。
粵海系噚日全線停牌，早前傳出粵海投資（270）、粵海制革（1058）及粵海啤酒（124）重組，果然有料到，而買家係粵投母公司廣東控股，唔知今次會否順便一次過向粵投注資呢？若果係，粵投就真係萬事大吉，不過股民想追貨就比較難，因為粵投復牌後，股價肯定會高開，然後就有人趁機出貨，因為春江鴨等呢日食胡，已經等咗好耐。不過，若果只係賣出粵海制革及粵海啤酒，而粵投未獲注資，則後市反而有炒上空間。
電盈（008）終於肯致歉，咁都算似番啲樣，但電盈只為通告引起混淆而致歉，今時今日咁嘅態度重未夠㗎，監管當局應該要加把勁向電盈施壓，無理由咁易放過佢，否則點對得住香港嘅股民？今次電盈除咗收購大東外，重傳出收購日本電信，可能電盈見過鬼怕黑，噚日索性掛免戰牌，發完澄清通告後至復牌。由於證券界對電盈收購大東意見多屬負面，芬佬多不會支持，電盈決定放棄收購計劃。講真，電盈負債纍纍，邊會有人諗到佢會斥巨資收購大東。
權智（601）近期股價升逾50%，噚日收報0.31元，成交480萬元。該公司近日頻頻進行回購，主席亦出手增持。黑客收到消息，公司可能與電盈在歐洲有合作機會。阿虎真係估唔到，電盈今時今日重可以成為三四線股仔炒作嘅藉口。Cookie話，其實今次幕後搵到高人相助至真。
阿虎