情人節你最想收到乜嘢禮物呢？小記做咗個街訪，發覺大部份女性唔多喜歡收到花（喺公司例外），其次係朱古力及衣着，最愛果然係鑽石飾物，愈大枚愈正！不過，我亦發覺送手表包冇甩拖，起碼襟戴實用，其中有對情侶更為咗一隻「勞」而度過別具意義嘅情人節呢！今年坊間推出咗唔少成雙成對嘅情人節手表，不妨揀番款，話唔定同情人有個浪慢回憶。
記者：梁煒健 攝影：陳智良、陳盛臣
當美容化妝品推銷員嘅Vivian，今年24歲，問其最刻骨銘心嘅情人節禮物，要算係佢21歲時男友送嘅一隻勞力士Boysize369手表。
Vivian表示：「隻手表貴唔貴唔係重要，但最緊要係呢隻表好有意義，因為我等咗3年㗎！其實呢隻369喺我17歲嗰年，我男友阿威已經買咗，但自己唔戴又遲遲唔送畀我；問佢點解，佢竟然話我重係口靚妹，話我襯唔起隻表，當時都唔知幾Hurt！誰知過咗3年，到我21歲嗰年嘅情人節，阿威竟喺海港城city'super食lunch嗰陣送畀我，呢個時候佢話我大個女喇，要出嚟做嘢，冇隻睇得吓嘅手表唔得㗎，於是就送咗隻369畀我，當時我的確好感動，因為等足3年！」
熱門情侶手表
今年大裝手表勁掂，呢隻cK大裝三針Chrono表，表面足有4cm直徑，的確夠大，外形更有點似名廠IWC㖭！此表有0秒計時、4字位又有日期顯示等功能；由於情人節係送手表嘅旺日，cK特別諗出新招，就係手表送上門服務。手表用心形外盒盛着，另附乾花一束，只要你女朋友仍返工，無論Office喺邊佢哋都替你送去。
以繩帶穿住嘅cK波波形手表，迷你型嘅時計藏於小小嘅球狀表殼，外表夠特別，繩帶設計又可作手鏈之用，佩戴時好有Fashion味道。
年年Swatch嘅情人節手表均有新搞作，今年亦不例外。本年名為「Aimingforyourheart」，表面冇乜特別，反而表帶上有愛神丘比特天使公仔好鬼Cute，本星期一定勁好賣。另外，凡購買今年Swatch情人節手表，即可獲得贈券免費換取價值$45嘅「DoubleRainbow」美式芝士蛋糕一件，但要預早2日去訂蛋糕。
紫色代表浪漫，齋係一條紫色橡膠表帶已經好吸引。本地品牌o.d.m.廠設計一對「MysteriousIV」DD98，最適合一男一女嘅戀人佩戴。一般功能如日、月、星期顯示均具備，跳字款嘅表面可由紫變白。
CITIZEN設計嘅手表款式唔算突出，但外表斯文夠實用，又有明星效應，其XC系列喺港、日兩地均深受OL一族歡迎。XC系列嘅表面採用最新Duratect硬質化技術，硬度比一般手表強4至5倍，特別襟磨。功能方面，白面嘅男裝與紅面嘅女裝功能相差無幾，可防水10米，具秒針計時及日期等。
長方形表殼，配合最Classic嘅兩針表，外表斯文大方。兩款手表均附送兩條顏色表帶，男裝是淺啡和深啡，女裝是深啡和棗紅。
記得約7、8年前，Swatch手表大紅大紫時已推出BlackSheep綿羊細表及大鐘；事隔多年，竟投入生產大裝X-Large系列，命名為BlackSheepToo，表面足有4.5cm直徑，非常大隻。今年係羊年，自然必買大裝羊仔表趁吓熱鬧，屬羊嘅更要搶喇！
店舖一覽
In-Watch（23889963）
地址：旺角彌敦道582號信和中心地下36號舖
CyberWatch（27801878）
地址：旺角彌敦道628號瓊華中心U06號舖
Swatch專門店
查詢電話：25105242
TicTacTimeCo.（25063168）
地址：銅鑼灣勿地臣街時代廣場二層地庫B203B號舖