能夠喺百忙中抽空打波已經唔容易；可以同一班國際傳媒喺NBA練習場打波就更加神奇，最犀利重係我打贏咗小馬嘅德國球星奴域斯基……嗰家姐！
原來每年嘅明星賽，國際傳媒之間都會一齊打番場友誼賽，雖然要晨早起身，得番兩個鐘頭瞓覺，但一聽到有波打就唔記得晒。去到球場後先知原來呢個都係鷹隊嘅練習場，唔怪之得咁靚喇。
除咗場靚，NBA重送咗件All-Star嘅練習雙面背心畀我哋，而且係非賣品，真係正！之後打pickupgame，每支隊伍都揀啲女仔。開頭見到敵方有嗰金髮靚女，唔單止睇得，重打得㖭。佢高過我之餘（近六呎高），射波技術都幾準，好彩最後我哋都贏到，打完專登走去同佢傾偈，嘩！原來佢就係大名鼎鼎西岸明星隊前鋒奴域斯基嘅家姐SlikeNowitzki（右）。Slike𠵱家就喺NBA嘅國際電視部打工；能夠同佢打波都幾好彩。今次又有波打，又有波睇，又識到靚女，真係不枉此行。