泰國叻人R叔近幾年經常在內地做生意，建立咗一個關係網，最近有泰國廠商搵佢做盲公竹，到中國落腳。R叔第一件事就係帶廠商到珠江三角洲巡遊，發覺十分繁榮，但港商台商已多，驚住唔夠爭；第二站就到上海，上海市只係吼財富五百大，對其他人冇乜興趣；第三站到上海外圍，行車一個多小時，當地領導隆重歡迎，視R叔與廠商為上賓，話明土地任揀，一百畝都唔係問題，地價平到笑，泰國廠商高興到暈陀陀，幾乎想立即簽字。R叔喝住，叫佢畀番自己一個月冷靜期。返泰國帶啲工程師設計師嚟睇清楚、度清楚，做齊可行性研究先，無謂貪地平，貿貿然投資也。
R叔話：「長三角一帶啲縣市確實發晒茅咁同珠三角競爭，政策優惠多到你唔信。我知你係市場學派，但唔好同我拗，我係廠商都幾大食咗啲優惠先，最多到第日優惠期滿，計過數，搬廠鬆人便是。」
外國資金就計過數，認為目前喺珠三角製造，最有效益。與R叔食飯嗰日，《金融時報》（第十三版）全版報道珠三角係世界工廠，直接勞工成本比上海便宜十五巴仙，比馬來西亞便宜三十巴仙。名牌皮鞋Dr.Martens本來在英國Northampton造鞋，現在頂唔順中國咁平，今個月開始，停止喺英國大量製造，改為向東莞嘅台灣廠訂貨，皆因英國工人周薪四百五十美元，東莞工人月薪一百美元，問你點爭！