近排成日聽班朋友話去紋身，聽得多連我都想跟潮流學人紋番個玩吓，原來深圳𠵱家都興呢種玩意，淨係東門一個地方就已經有十幾間，而且價錢只不過係香港嘅七成，搞到好多香港人都專程走上去幫襯。我知道其中兩間就最受歡迎，除價錢平同手勢好外，最大吸引力就係可以將自己個樣紋喺身度，其中一間店嘅老闆就將自己個樣紋咗喺女友嘅鎖骨，相信是繼紋名後另一將會大熱的「愛的紋身」！
記者：黃希知 攝影：Alex
ImageGirl：Doris
紋身店面積不大，但四堵牆就掛滿各式各樣由人手繪畫嘅紋身圖案，款式多以龍虎鳳同神佛為主，每一幅圖都係由老闆同幾位修讀過美術嘅紋身師傅設計同繪畫，由得意嘅Cute版公仔到威猛嘅動物都有，難怪唔少香港人都鍾意嚟呢度幫襯！
紋身店負責人黃小姐話最多女仔鍾意紋花卉同卡通圖案，計我話最好學ModelDoris咁紋在鎖骨位，師傅只係用咗十分鐘，Doris身上已經多了朵玫瑰，雖然只係草圖，但畫工非常細緻，跟住師傅就用紋身機逐點將顏色蝕入皮膚，大約一個鐘就搞掂。價錢要視乎圖案的大細同複雜程度而定，由?200到?5,000不等。
「近年明顯多了客人紋荊棘圖案，好似謝霆鋒咁紋腰骨位嘅比翼雙飛圖案就特別Hit，圖案可依自己的喜好及所紋嘅部位而將其放大縮細，唔鍾意嘅話，我哋重可以幫你重新設計，畫到靚為止。」黃小姐說。
老闆的作品中以龍、虎同佛像最多，款款都栩栩如生，夠晒威猛，呢啲圖案最受男士歡迎。好似呢隻上山虎雖然唔算好複雜，但如果紋晒成個背脊的話都要兩個鐘，紋手臂一個鐘就可以起貨，需時較短。
原來複雜嘅日式圖案係最受香港人歡迎，好似呢幅武士抱魚圖，淨係勾線條就要用上兩個鐘，如果連埋上色就需要兩個半鐘，武士雙眼畫得充滿怒火，紋在背脊，成個日本山口組成員咁！鍾意嘅可以講出要求，由老闆幫你設計，紋出嚟就唔怕同人撞，夠晒獨一無二。
華姐專業紋身
電話：(86)75582290528
地址：深圳東門中海商城2樓2118室(深圳戲院2樓)
營業時間：上午10時至晚上10時
收費：?200至?5,000不等
紋身用的針分為四種，最幼嘅三針用來勾線條，五針同八針較少會用到，最粗嘅十針會用嚟上色同打陰影，「我哋每次同客人紋身都會用新針，紋完支針都會畀番客人帶走，客人自己可以保留下次再用，咁樣較衞生。」老闆黃生表示。
老闆話佢除咗設計圖案外，連紋身機都係由佢自己一手一腳設計兼監工製造，佢攞住張設計圖就解釋：「呢款紋身機速度較市面所賣嘅紋身機快，上色快加上力度大，紋出嚟嘅線條夠圓滑，而且都無咁痛。」
另一間位於東門嘅紋身店，客人有一半都係港客，老闆黃河由4歲開始學中國畫，所以中國味重嘅畫同人像就最擅長。不過我最欣賞係老闆的待客之道，佢話即使個個客人揀嘅係同一款圖案，佢每次紋都會稍作改變，包保與別不同。紋完支針同樣會由客人保管，咁就唔怕感染或者敏感。
呢個紋身相信是老闆最情深嘅作品之一，就係將自己個樣紋咗喺自己女朋友的鎖骨位。問阮小姐點解會紋黃先生個樣：「我好鍾意佢，所以我要求將佢個樣紋上去，我諗第時會將自己啲仔女嘅樣紋埋上去。」問黃先生身上有冇女友個樣嘅紋身，佢居然話：「我信唔過其他人嘅紋身手勢，所以我唔會畀人幫我紋。」咁答案即係──無。
老闆畫自己個樣就真係似模似樣，原來畫其他人物都咁勁，就好似呢個毛澤東樣最煞食，紋喺手臂夠晒Yeah，勁有國產Feel，但老闆話呢款近排已較少人紋，至於關帝、觀音、佛祖等都有唔少捧場客，不過近排就反而多咗人攞埋張相畀佢照住紋，每張相?1,000起，玩到紋自己個樣咁激，實唔怕同人撞啦！
店內的鎮店之寶便是老闆最擅長嘅抽象龍圖，「我覺得紋身可以將中國畫推介出去，可以畀多啲人知道同認識中國藝術。」他表示好多外國同香港嘅客，都鍾意紋呢啲帶有濃厚中國特色嘅龍圖，而我就鍾意呢啲圖案簡單又夠Cool，同一向見開五顏六色嘅龍虎鳳好唔同，好有個人風格！
黃河紋彩中心
電話：(86)75582358161
地址：深圳東門東港中心3樓208室
營業時間：上午10時至晚上10時
收費：?300至?3,000不等
紋身原理其實係用針將顏料蝕入皮膚內，所以通常在紋身後，紋身師一般都會向客人講解紋身後嘅護理方法，最基本嘅有以下4樣：
1)紋身前要有充份休息，唔可以飲酒，精神要保持最佳狀態，以確保血液運行得最好。
2)紋身後幾日應少飲酒、少食辣。
3)紋身後半個月內唔可以游水，避免受細菌感染。
4)一個星期內避免接觸刺激性清潔劑如番梘、沐浴露。