太多人諗住個市會淡，個市就唔淡畀你睇，恒指由最低9132彈番上嚟，最後有81點進帳。先排提及嘅太ACall輪9475同九倉Call輪9476，受到正股強勢帶挈，分別上升15%同12%。𠵱家追輪，最好搵啲落後藍籌輪埋手。
中銀（2388）喺8元左右搵到支持，近期成交唔多，買盤則好重，全日成交3球幾，8元及以下，連續3檔，求買盤量都超過5球。昨收8.10元，升10仙，中銀Call輪9462，升得0.5仙，呢件追得過。9462今年7月到期，現價9.4仙，溢價1.5%，槓桿率8.6倍。滙豐（005）俾人柴台柴咗好耐，昨升75仙，沽盤告一段落後，會有機會彈多一兩蚊，拉起中銀，揸9462博兩分錢回報唔係太難。
朝早開市前，中移動（941）買賣盤都係掛17.55元，正式開市當然係呢個價，跌20仙，午後殺上17.85元埋單，反升10仙，由上月中20.20元散落嚟，有技術性反彈好應該，搵中移動Call輪玩吓短線，贏面高，最佳對象係隻最熱門貨色9600，除咗恒指輪外，成交金額最勁嘅係呢件，收12.5仙，升0.8%，未跟貼正股，6月夠鐘，溢價12.8%，槓桿率14.3倍，1日成交200球，佔咗發行量近6成，把握得好，1日可炒幾轉。
章盛