小初成日覺得，分析員同芬佬其實好似趨炎附勢嘅師奶，好似好多股票明明炒到過晒籠，但佢哋見其他人唔沽，佢哋亦唔敢沽，重慌死蝕底繼續買上，終於搞到唔少基金股股價高處未算高。
例如將於星期三成為藍籌新貴嘅思捷環球（330）咁，雖然股價已經升咗好多，現價PE接近19倍咁高，但多間外資大行繼續堅持買入嘅評級，話佢即將公布嘅業績，正到你唔信喎。
思捷股價噚日再升4%，收15.15元。一眾董事前排沽貨套現，發咗大達，但班芬佬仍然睇好，話股價有機會見17元。
小初嘅女友，甚少買思捷產品，外資分析員亦同意香港及亞洲零售業務唔多掂，不過，思捷產品在歐洲原來好掂，成為主要收入來源，加上歐元升值，連滙水都賺埋。
另外，早排被基金力質嘅比亞迪（1211），自從有外資芬佬力撐之後，股價亦重拾升軌，連分析員亦轉view睇番好，又一趨炎附勢嘅表現，隻股噚日亦升4%，收15元，服未？
慕容小初