股市要升之時，壞消息阻唔到；股市要跌之時，好消息亦頂唔住。好似上周五咁，美國公布1月份失業率由6%降至5.7%，非農業職位大增14.3萬個，兩個數字均遠勝預期，若在半年前，這組數字一出，杜指唔升兩百點才怪，可是上周五杜指僅於開市升過幾十點，好快就反覆回落，收市倒跌65點，報7864。
美股咁都升唔起，或者同美國把恐怖襲擊威脅升級有關（由原來的黃色升級至橙色，為第2高危級別）。無論如何，美股如此表現，不獨令好友氣餒，連趙飛雲呢類等反彈再沽嘅淡友，亦大感失望。今次真係計錯數，一心以為美股港股超賣，只要有一兩個重要經濟數據靚靚，就會挾淡倉，故此過完年後一直唔敢做淡，錯失機會。不過阿Q啲諗，好彩重未勇到買Call輪博反彈。
從技術角度嚟睇，港美股市大勢向淡已毋庸置疑。杜指、納指同標普500指數，均跌破頭肩頂頸線，港股方面，恒指、和黃（013）同滙豐（005）亦確認頭肩頂，問題係會唔會先做後抽，抑或係再跌深啲先至反彈。照目前形勢，後者機會似乎較大。
趙飛雲喺現水平唔願追番啲恒指Put輪，始終覺得風險大過回報。𠵱家做淡友，揀個別股份嘅Put輪，相信回報會更大。長實（001）上周五剛剛跌破頭肩頂頸線，即使後抽幅度亦有限，下跌空間則頗大，兩隻長實Put輪9542同9567均可考慮。9542相對較便宜，但3月17日到期，炒賣之時要睇住日曆。
趙飛雲