明星賽周末除咗有各樣比賽，當中嘅JamSession亦係老少咸宜嘅好地方。除咗有得玩，重有公開畀球迷齊齊睇球星練習，一睹自己偶像風采，簡直就係群星會。（有線ESPN台今日9:00am、亞視本港台9:15am現場直播NBA明星賽）
今日就進行咗明星練習賽，喺練波前本來我想問吓今年明星賽票王拜恩，獨取四十六分打低紐約人，又有球好靚嘅側身入樽有何感受，但係佢被記者重重包圍埋唔到身。反而佐敦同姚明練波前都開咗個簡短記者會，佐敦重話就算今季攞到總冠軍，都唔會改變佢退休嘅決定，令我呢個佐敦忠實fans心都灰埋，不過能夠在現場睇佢最後一年打明星賽，總算不枉此行。
終於練波嘞，你估班球星練波又會幾認真？班東岸球星就剩係圍住中場線射波，第一個射入竟然係獲加，不過佢就偷雞行前兩、三步先射；而被傳媒煲到有結怨嘅佐敦同教練湯馬士，都有傾有講。
另外，之前打死都唔肯讓個正選位置畀佐敦嘅「AirCanada」卡達，諗住今次佢會同「波神」面左左，點知兩條友全場都有講有笑，一啲芥蒂都冇。西岸球星就比較認真啲，起碼大家有練吓OneOnOne，其中竟然拜恩更自告奮勇，要防守比佢高成呎嘅姚明，最後當然係兩個玩埋一堆收場。
講起姚明，佢件波衫就喺JamSession最好買。我問其中一個售貨員，佢話唔知幾感激姚明，因為個個都係嚟買姚明波衫，所以呢幾日佢剩係企響姚明件衫隔籬就掂。
想知我喺現場睇明星賽感受，記住聽日黐住本報！
記者雷海彬亞特蘭大直擊