泰國與柬埔寨，無風起浪，竟因為一家報紙亂咁引用泰國靚女明星之言（吳哥窟係泰國領土），搞到金邊（柬埔寨首都）暴徒火燒泰國大使館、搶掠泰國酒店、泰國人貨倉，簡直莫名其妙。
呢日食午飯時間，與泰國叻人R叔坐埋一齊。R叔係華人，泰國籍，居港多年，精通泰國內幕，梗係問番幾句啦。
R叔話：「紅顏禍水，冇乜講錯。女明星與柬埔寨總理韓森聽講來往甚密，好鬼friend，一張反對黨掌握嘅報紙想搞事，砌女明星生豬肉，其實想令總理尷尬，點知柬埔寨人民一睇就怒火沖天，搞出個大頭佛。一間泰國水泥廠，一晚唔見咗五千包水泥，損失慘重咯；一間泰國人開嘅保險公司，生意做得好大，居然冇俾人燒到，點解呢？因為法國人佔一啲股份，派一個法國仔做主管，柬埔寨人衝入去，法國仔大講法文，啲暴徒就走咗，可見前殖民地嘅餘威猶在！」
柬埔寨人重係崇敬法國佬，點解唔順同係亞洲人嘅泰國佬？R叔話：「柬埔寨自赤柬復元後，好倚靠泰國人投資，十幾年來成個經濟俾泰國人控制咗，有啲似係經濟上泰國嘅殖民地，所以有乜依郁，就乘機發洩囉。」
講到底，其實泰國商人即係華人，泰國華人與柬埔寨華人聯手，掌握柬埔寨經濟命脈，啲柬埔寨土著唔反法而反泰，實際就係反華，一如印尼排華。