有線將於六月成立二十四小時娛樂新聞台，不斷送上中港台、甚至日韓以及外國的娛樂新聞，為打響頭炮，有線準備重金挖角即將約滿無綫的曾志偉做主持。有線電視執行董事徐小明表示，娛樂新聞台更會採訪無綫的宣傳活動。
香港年輕人眼中二○○二年十大新聞，排首位是《東周刊》刊登女星裸照事件，而謝霆鋒頂包案和羅文病逝亦在頭五位之內，可見娛樂新聞在香港的重要性。有見及此，有線決定開創華語電視台先河，於六月成立一個二十四小時娛樂新聞台，形式有如有線新聞台，每天二十四小時播放娛樂新聞，並擬邀無綫收視之寶曾志偉任主持。
即時微波傳送片段
有線方面十分重視發展二十四小時娛樂新聞台，故有意重金禮聘與無綫約滿在即的志偉過檔。有線電視節目部執行董事徐小明昨日證實以上消息，他說：「曾志偉的確係我哋心目中嘅理想人選，我哋好想同佢合作，但重未正式傾過。」據知有線方面亦有意找林建明任主持人，雙方曾作初部接觸。雖然林建明現時身體不適，需要休養，但距離六月開台還有一段時間，所以不排除到時有合作機會。
徐小明說：「𠵱家娛樂新聞喺香港經常成為社會話題，所以我哋覺得娛樂新聞係重要，可以令觀眾嘅壓力得到鬆弛。再加埋今年係有線十周年，所以決定成立二十四小時娛樂新聞台，以中港台三地嘅娛樂新聞為主，前半小時係娛樂新聞，後半小時係新聞花絮，另外亦會有娛樂專題。我哋已經同台灣、內地搭通天地線，亦會有外國、日本同韓國嘅每日最新娛樂新聞，一有新聞就會用微波傳送，以最快嘅速度送去觀眾面前。據我了解，𠵱家全世界只得一條外國頻道係咁做緊類似嘅嘢，中文台咁做係獨一無二。」
隨時使七、八千萬
徐小明續說：「三月開始我哋會正式招聘，包括記者、編輯同主播，最少要請五十人，其實之前已經暗中試行咗兩個月，主管級已經到位，年中就可以正式同觀眾見面。一般嚟講，投資一個咁嘅台最少都要七、八千萬，但以我哋有線本身嘅資源，真正要投資幾多重未有約數。」
現時大部份香港的藝員和歌星都跟無綫有合約，不能接受有線訪問，有線現時的做法是取巧混入台灣的電子傳媒中，以國語作訪問。問徐小明合約問題會否對娛樂新聞台帶來不便，他說：「呢個台係以採訪新聞為宗旨，我哋並唔介意幫其他電視台宣傳，亦唔介意採訪其他台嘅藝人，無綫有宣傳活動，我哋一樣會去採訪，除非唔畀我哋入啫。但我相信無綫係呢行嘅大阿哥，會明白咁嘅採訪形式對大家同對觀眾都有得益。」
「歡迎同無綫宣傳」
對於有線開設娛樂新聞台採訪無綫活動，無綫助理總經理陳志雲昨在電話中表示歡迎：「我哋好歡迎其他電子傳媒幫無綫做宣傳，始終有部份宣傳活動係公開性質，唔可以阻止其他人去採訪，但一啲非公開性質嘅宣傳活動，就需要有無綫邀請信先至可以採訪，而無綫邀唔邀請又係另一個問題。」
陳志雲續說：「不過，同無綫有獨家合約嘅藝員，喺未得到無綫同意之下，係唔可以接受無綫以外嘅電子傳媒訪問，除非係一啲正式新聞節目，或者係新聞性嘅事件。而且，唔係話娛樂新聞台就係新聞，好似《娛樂大搜查》同《今日睇真D》咁，都係非新聞性節目，對廣管局嚟講，呢類節目所受嘅監管亦同正式新聞節目唔同。」
採訪、攝影：張止寒、戴彩煥
