近年有唔少藝人嘅第二代加入娛樂圈，但成功出到位嘅，數來數去只得檸檬一個。其實有位外形高大嘅藝人第二代花弗仔，本來都有機會上位，可惜佢成日掛住媾女，同埋自視過高，搞到神憎鬼厭。話說早排花弗仔同一班無綫嘅員工去西貢相思灣燒嘢食，燒到大概凌晨三點左右，佢哋送其中一個人返大埔仔嘅屋企，由於個個飲大咗，花弗仔竟然無端端同其中一個無綫訓練班出身嘅男藝員嘈起上嚟。
當時花弗仔好大聲咁鬧對方話：「你唔好以為自己巴×閉，你訓練班出嚟㗎咋！」搞到個男藝員好鬼㷫，反駁花弗仔話：「你估你又好巴閉咩，你係靠你老竇先至有人識！」兩個人初則口角繼而動武，現場十幾個人惟有即時將佢哋分隔開，但冇幾耐之後竟然有警車到場，原來係附近嘅居民投訴佢哋擾人清夢，警員登記晒佢哋嘅身份證之後，花弗仔同男藝員當然速速離開，但搞到咁嘅局面，你都咪話唔羞家！
名模Rosemary噚日着住件透視衫喺屯門出席「幸運大抽獎」活動，Rosemary話新年嗰陣媽咪冇畀利是佢。因為屋企都唔興派利是，就連喺外地嘅細佬都冇返香港過年。問到佢有冇去男友Gordan屋企拜年，佢話：「Gordan都要去親戚度，同埋佢又掛住瞓覺。不過，情人節我打算買份Gordan鍾意嘅禮物畀佢。」
陳司翰自從同EMI唱片公司解約後，就轉戰台灣。最近陳司翰同陳怡蓉合作拍台灣偶像劇《又見橘花香》，陳司翰飾演景觀設計師，日前去咗陽明山一個海芋田度拍外景，俾好多遊客圍住要簽名。陳司翰話佢過年嗰三日假病咗，成個人瘦晒，搞到做嘢都冇晒精神，鼻音加唔純正嘅國語，頻頻要NG，連佢自己都笑住話：「我𠵱家係NG第一名。」
三人組合E-kids噚日喺荃灣愉景新城為福幼基金義賣籌款，在場人士可以買熊仔之餘又可以攞佢哋嘅簽名，所以噚日嘅反應都算熱烈，吸引咗近百歌迷到場支持。而E-kids將會喺四月推出新廣東碟，新碟嘅大部份歌曲都係佢哋自己創作嘅，佢哋話：「我哋啲歌唔只係情歌，重有一啲關心嘅訊息，而且好多都係作畀歌迷㗎。」
由本地四間電子傳媒，包括港台、無綫、亞視及有線一齊進行嘅「2002電視節目欣賞指數調查」，第四階段嘅調查結果，喺九十九個節目當中，以港台製作嘅《鐵窗邊緣》排名第一位，而無綫電視劇集《談判專家》同埋《流金歲月》亦都入咗排名榜嘅二十位之內，分別佔十七同二十位。
