呢輪二三線股真係活躍，小初上周六打波，又聽到大經紀講，有班大陸客想炒起華瀚生物製藥（587）。
華瀚於舊年12月上市，當時發售嘅新舊股加埋1.4億股，每股0.77元。當時股市氣氛差，冇乜街外人肯要貨，但好彩有條大陸水喉射住，先至成功圍到飛上市。
隻股上市初段股價本來企得好穩，但受到有幾隻細價股篤數上市，被廉署拉人事件影響，一度插落去最低嘅0.51元。但由於華瀚街貨實在唔多，所以股價好快趣就抽番上0.70元樓上，班大陸客日日搓波仔，仍未散到貨。
上個星期隻股開始有異動，不但成交大咗，重突破0.77元嘅招股價，浮番上水面，上周五收0.83元，升2.47%。
大經紀話，由於呢排好多中資藥業股表現唔錯，所以唔排除班大陸炒家亦想借勢做嘢，但暫時獲利盤沽壓唔細，可以等股價回落至考慮。
慕容小初