我老友阿新係SonyEricsson嘅忠實Fans，換來換去都離唔開呢個品牌，近日佢𢭃咗好多利是諗住換部新嘅，當然首選愛記啦！不過佢就投訴無乜新選擇，T300同T68i賣咗好耐嫌佢哋Out，T100係新款但又想買部彩芒。不過，我就話佢聽應該好快會有新機出，皆因近日喺網上傳得好「行」，話有兩部T系新機會出，外形好似家陣嘅T100同T600，不過兩部都係彩芒。老友阿新聽完之後話唔換機住一於等。不過始終係傳言，都唔知等到幾時！
文：羅新基
我羅新機自問記憶力唔算差，惟獨是三星啲機真係搞到我頭都大埋，無計，部部個樣都差唔多，對摺再加兩個芒，甚麼A100、N200、T300、A400……，邊記得咁多，好似部S300差啲走漏眼，因為佢同返咗個多月嘅A800真係好似，機身修長又係雙芒，若然唔係舖頭大大個字寫住最新抵港，都唔多覺佢係新機。
呢部S300最特別嘅地方，就係連個機面芒都玩埋彩色，內芒65K色，外芒就256色，至於賣幾銀，貫徹三星水貨嘅高開價，坐底四千二。
諾記部玩Game專機最近就有更詳細嘅資料，似足GBA嘅外形唔使講都知佢係為打機而設，行三頻嘅佢更有埋MP3同收音機功能，重有MMC插槽，而呢部N-Gage重好以GBA咁可以插遊戲卡，預計N-Gage會響今年年底上市。