女人從來都是口不對心的動物，口講就話送花嘥錢又唔實際，其實心底裏都恨不得可以在14號當日同Office班姊妹耀武揚威，所以，在這個約定俗成的一天，男士們實在別無他選，就算一束花賣價要一千幾百都只能乖乖付錢。適逢今年情人節的鮮花價格比往年提早上漲，而且佳節愈近花價亦會相對地不斷升高，唔想買貴花咁肉赤，睇完以下推介之後，就要快手落order了！
記者：尹珊珊 攝影：陳穎、伍慶泉
ImageBoy&Girl：Sylvia、Wicky
法國，象徵着浪漫的國土，由法國時裝品牌開設的附屬花店，同樣帶着絲絲法式浪漫情懷。與大大束堆滿彩色包裝紙、紗網的鮮花相比，由agnesb.Fleuriste設計的十一款情人節花束，雖然乍看係少咗一份大堆頭的霸氣，但相對地小小的一束法式田園Feel鮮花，卻可以突出到鮮花雅致清麗的一面，最適合送畀氣質同樣脫俗高雅的女朋友，再加上agnesb.本身已有一定的名牌效應，要討好OL和潮流索女的歡心並非難事。
一朵朵比拳頭更要大的繡球花，毋須加插多餘的襯花作點綴，已覺燦爛奔放。
火辣辣的紅玫瑰一向是情人節最熱門的花種，24支鮮花則代表了思念、純潔的愛，借助一束24支紅玫瑰向情人表白堅貞的愛意，就算貴少少都值番晒。
agnesb.Fleuriste
地址：九龍塘又一城LG1-40號舖
電話：22658388
運費：地鐵及九鐵沿線需附加$50-$80服務費，其餘地區另行商議。
對於一班懶人來講，click一click就可以透過網上花店送花畀女朋友，實在省卻唔少麻煩，經營網上花店有四年的曾先生表示，每到情人節的生意額便由平日的百零個order，暴增至千多個order，足夠頂得住半年的生意。
「其實上網分分鐘重可以買到平花，事關我哋嘅營運成本比街舖低，筆租金可補貼廣告，花價亦可以稍作調整。」好似一束24粒的金莎花，好多花店買成五百幾蚊束，但在Flower100.com訂購差唔多平成截，老闆娘Fanny大膽話係全港最平。
不過幫襯網上花店時最好留意埋網址有冇列出公司地址同電話，有咩事都可以追究，好似曾生每逢收到定單同入數收據，都會覆個e-mail畀客人，咁有交帶客人自然有信心啦！
分24粒($299)、48粒($540)及99粒($990)三款，其中以48粒最得體，花束大小亦最恰到好處。
形態優美的鬱金香，是近年情人節花束的後起之秀，只因唔少年輕一輩的女性，都會嫌冶豔的紅玫瑰花太俗氣，改送鬱金香可謂不二之選。
Flower100.com
網址：
地址：尖沙嘴厚福街3號華博商業大廈901室
電話：23852024
備註：2月12日凌晨12時截單
盤據在中環超過五十個年頭的中西花店，多年來儲落董太、陳太、梁司長、曾司長等一大班高官闊太熟客，可謂貨真價實的老字號，就因為有呢塊金漆招牌做保證，就算花價比出面貴少少都抵啦，特別係第一次送花畀女朋友更加係不容有失，挑選店子為情人節而設計的花束，包保一擊即中。
情人節買一束11支的美國玫瑰肯定無衰，顏色可選香檳色、黃色、白色、粉紅色等，不過最穩陣都係離唔開紅玫瑰。至於支數方面，11支代表一心一意、12支代表全部的愛，兩者售價劃一，視乎閣下想表達的意思。
唔係新張喜慶的日子先可以送花籃，買個「無盡的愛」花籃畀女友威威，效果比一束玫瑰花更架勢，每個花籃裏頭有繡球花、鬱金香、玫瑰等多種唔同的鮮花，再以一個心形藤枝作點綴，當然售價方面亦會較高，三個Size分別為$1,280、$2,800及$3,800。
中西花店
地址：中環威靈頓街50號地下
電話：29212986
運費：$80-$200，視乎地區而定。
以為一招鮮花贈佳人就可以輕易過關，只怪你重未清楚女人的天性，皆因大部份女人都愛得一想二，有束靚花之後自然想要多份實質的紀念品，無怪乎有人話情人節係男人受難日。
以人手用再造紙製成的心形座枱燈，話就話用紙做，質料卻比想像中實淨厚身，換埋個彩色燈泡就更能營造出浪漫氣氛。
印滿紅白心心的雙人夾棉被，尺碼為190cmX190cm，雖然四四方方又唔算厚，但相信情侶們所燃起的一股激情，足以令室溫連隨上升。
由專人設計的情侶鎖匙扣，似足一對迷你麻將，唔單止照顧各男女朋友的需要，重有男配男、女配女的組合，夠晒全面。
表面有黑、白兩色可選，最頂癮係表盒同日曆位均印有2003年2月14日的字樣，象徵每日都係情人節咁甜蜜，而且價錢夠平，買來收藏都抵。
kimihe
地址：尖沙嘴加連威老道54B地下
電話：23121008
ichome
地址：銅鑼灣東角道24-26號東角馬尺2層203號舖
電話：28666654