日前，德國平治車廠公布咗該廠響2003年1月嘅銷售數據，表現較去年同期有所上升，實在令人感到鼓舞；喺剛過去嘅1月，平治廠方全球合共售出81,100部私家車，較2002年1月嘅80,300部多出800部，另外響上月亦售出6,000部Smart，從而令上月嘅私家車銷售總數高達87,100部。若以分區計算，亞洲區合共售出8,400部新車，較2002年1月勁升33%，其中日本更成為最主要嘅市場，佔亞洲區銷售總數嘅3,200部，亦較去年同期上升15%；而美國市場亦錄得4%升幅，合共售出15,700部新車。雖然平治響亞洲及美國市場有相當不俗嘅成績，但響歐洲市場嘅表現卻略為遜色，其中響德國本土就較去年同期下跌6%（共售出20,300部新車）。
另外，新E-Class自於全球市場推出以來表現愈見出色，響上月共售出19,900部新車，其中4,400部係售予美國市場；而S-Class亦於1月售出5,900部新車，成績亦較去年同期上升23%。