上年情人節撞正農曆年初三兼赤口，搞到好多拖友同屋企人為拜年定約會而角力，幸好今年情人節同新年相差十幾日，有充足時間畀你揀禮物。今年不妨考慮送番部靚仔MP3Player畀至愛，因為大把時間畀你搜羅一堆MP3情歌錄落部機，等女朋友返工去街都聽住你錄嘅歌，肯定冧到暈。
記者、攝影：徐影龍 ImageGirl：Kelly
Creative早排頗叫好叫座嘅MuVo，除同樣以迷你機身同搶眼賣相為特色外，最特別係部機可一分為二，藍色機身主要係放一粒3A電嘅盒，白色機才是真正主角，解碼晶片、記憶體同I/O控制統統內置其中，分開最大作用係可搖身一變成USB記憶手指，直插電腦度抄歌，大部份電腦均毋須安裝驅動程式及麻煩嘅接線，操作難度近乎零。抄完歌後，再二合為一拍番埋就可播放情歌，代表「二人同心，聽歌勁冧」，又多個借題發揮𠱁女朋友嘅話題。
Creative(HK)
查詢電話：21486151
JNC近排好積極推出新款手機同MP3Player，而且質素不俗，就好似最新款嘅SSF系列，最正係除淨銀色外，重有紅、藍兩色，一人一部掛喺頸拍住拖出街肯定羨慕死人。機身長度比八達通稍短，不論掛頸或放喺衫袋都無問題，其他功能有環球文字顯示支援、背景燈及錄音功能。
而佢全球首創嘅手機連動功能，可接駁同一品牌嘅MX-7920手機，不但聽緊MP3都可接收來電，亦可做到即時錄音功能，128MB足足錄到9小時，實行錄低綿綿情話再慢慢回味。
捷訊科技
查詢電話：24812368
128MB錄到32首歌都嫌少？咁就要試吓以硬碟作儲存媒介嘅機喇！蘋果電腦iPod內置20GB2.5"小型硬碟，以MP3標準4MB一首計，足足可儲存達4,000首歌，每日聽十首都聽足一年有多，最啱漫漫長夜聽住情歌睇星星嘅拖友。機身設計亦算小巧，全白色機身喻意女友恍如白之戀人，夠晒浪漫喇啩！若嫌價錢超出預算，亦可選擇較低容量型號，最細嘅5GB賣$2,500，另外重有款10GB型號，賣$3,100。
蘋果電腦香港訂購網址：
齋送機畀女友太過欠缺誠意，預先抄歌落部機肯定加唔少體貼分。DIYMP3情歌難度唔算高，較熱門有《MusicJukebox》多功能音樂軟件，不過今日筆者推介另一款軟件《Nero》，原因係《Nero》操作夠簡單，兼且具有影音重新編碼功能，編輯完重可即燒落CD，唔送MP3Player都可簡單自製情歌CD同VCD。
1 第一步先將音樂CD上嘅音軌擷取落嚟，安裝及開啟《Nero》後，如圖般選擇「燒錄器」＞「儲存光碟軌道」。
2 可先試聽每首音軌，揀啱靚歌後就要選擇轉換檔案格式嘅類型，另外重有消除靜音、調校音量及儲存位置等選項，按個人喜好而定。
3 雖然今次目標係MP3格式，不過仍需喺「設置」選項度作適量調校，如選擇編碼嘅壓縮比率，基本上壓縮得愈高，檔案容量就愈細，不過就會降低音質。設定完成後就可按確定開始進行壓縮工作。