美味情緣：
兩隻為食貓拍拖鋸扒林袓輝姚嘉莉鍾情極黑牛

今年中西情人節適逢周五、周六，浪漫假期的第一步，自然是吃一頓豐富的情人節大餐。請原諒我為人老套，與情人鋸扒慶祝的觀念已經根深柢固，不過情人節喎，唔食得特別啲就無意思，今次搵到一對跟我一樣對鋸扒情有獨鍾的情侶林祖輝和姚嘉莉，來到Mr.Steak試試美日的愛情結晶品極黑牛。

記者：邵超　攝影：伍慶泉

祖輝和嘉莉拍拖快將五年，亦可以說是食足五年，經常跑到Mr.Steak鋸扒，其他至愛分別是生蠔、青口、鵝肝、紅酒及甜品，日復一日食下去，祖輝的身形暴脹，嘉莉卻得天獨厚，食極都唔肥，羨煞旁人。

大食嚇走男朋友
睇嘉莉身形咁Fit，以為她在節食，完全估唔到她的肚容量驚人，在場的嘉莉媽媽踢爆她在六、七歲時，已能一次過幹掉兩份牛扒，較大人有過之而無不及。「我嚇走過好多男仔，不過我唔會故意喺男仔面前扮嘢食少啲。我最怕男人食得好少，女仔都係！生命的樂趣就是食。」
嘉莉不時被朋友訕笑是大胃王，幸好遇到祖輝，二人口徑一致，祖輝亦講出為食鬼最痛：「最忌同枱食飯有人食得少，但同我講唔使就佢，聽到真係好無癮。最怕唔可以同女朋友分享食物。」

拍拖秒秒鐘開餐
一早聽公關大員講祖輝、嘉莉極之愛食，聽他們講拍拖生活，咁多年嚟重點戲仍然是食。他們最享受一邊睇戲一邊食零食，祖輝大讚AMC戲院的蜜糖腸，通常他們戲未放映已幹掉一盒，再飛奔出外買。嘉莉話閒時行吓Citysuper和Great，買塊靚扒返屋企煎已經好開心。
祖輝：「我哋第一次約會在DanRyan's鋸扒，完全Americanportion。大家都好鍾意食扒。今次第一次食呢個極黑牛，比起平時食開的D.A.扒薄身，肉味和香味重啲，mix埋麼利菌更香，帶起牛肉的鮮味。成個餐我最鍾意呢道菜。」

日日都係情人節
拍拖耐咗，祖輝、嘉莉已經唔會為情人節而大費周章，昇華到只要在情人節前後，若吃到一頓好的，便當當日是情人節。
嘉莉：「最近最深刻的一餐飯，是在西貢食早餐，嗰日我哋拖狗行街，在一間露天餐廳食咗一個傳統英式早餐，有狗、有海風，真係好舒服。有咩舒服過禮拜日朝早瞓飽，然後悠閒食餐飯呢！」
坐在Mr.Steak的露天座位上，閉起眼睛，隨着嘉莉的描述想像，柔風拂面，三里屯驟變西貢，獨欠那可愛的小狗隨侍在旁。

祖輝、嘉莉至愛
LoveMeTender(燒美國極黑肉眼伴香草牛油麼利菌汁)
極黑牛(美國和牛)是日本和牛跟美國安格斯牛配種而成，既有日本和牛的嫩滑，又有美國頂級牛肉的口感，因身上毛髮大部份為黑色，故稱極黑牛。極黑牛年產量5,000隻，十分矜貴。

嘉莉試味報告： 好香濃的牛肉味，食落好腍，我好鍾意食。

煎魚似蒸魚
UnchangedMelody(香煎東星斑白蘆笋伴蟹子香草汁)

祖輝試味報告： 好少西餐整魚會咁好味，東星斑好似蒸魚咁滑，又有香味，好正。

脆鹹鮮三種口感
OnlyYou(龍蝦三重奏)

嘉莉試味報告： 一碟有好多嘢食(焗龍蝦酥皮、三文魚腩捲芝士龍蝦和龍蝦拑)，平時好怕芝士的濃味，但呢個GoatCheese魚子醬唔heavy，幾好。

鮮果味重
KissMeHoney,HoneyKissMe(情人節特色甜品)

嘉莉試味報告： 有好fresh的鮮果味，配落朱古力慕絲唔太甜幾啱我。

Mr.Steak　
電話：28021128
地址：灣仔港灣道28號三里屯一樓10號舖
「情人節浪漫晚餐」/$498/位
時間：6:00pm-12:00mn