華懋售樓部經理吳崇武噚日同埋美聯一班董事，齊齊去車公廟拜神，但唔係求自身或者財運，而係祈求羊年樓市興旺，蘭西心諗，全港市民都係咁希望。
美聯董事布少明同蘭西講，其實美聯新界區高層年年都有拜車公，有一次同吳崇武傾開，先知佢又係年年都拜，所以約埋一齊，揀咗噚日去，轉吓風車同打打鼓，希望樓市興旺同經濟好轉。
講開美聯，啱啱有兩名要員升職，92年加入美聯嘅伍創業，由98年起四度升職，今次升為港島東南區營業董事。至於89年加盟美聯嘅馮劍釗，就由中西半山高級區域經理，升為區域董事。
另外，中原天水圍區都有兩位主管級人馬，羊年雙喜臨門。原本主打天水圍嘅高級區域經理方啟明，今年擴張版圖至屯門區，晉升為兩區高級區域經理。唔講唔知，原來方兄92年加入中原時，第一個據點就係屯門，重係開荒牛之一。中記第二樁喜訊，就係天水圍分區經理徐志華，升為區域經理。
雖然生意淡薄，地產代理行都唔敢鬆懈，仍然搏爭做獨家盤。好似近排將軍澳咁，區內嘅將軍澳中心畀中原獨家之後，美聯翌日即刻攞咗維景灣畔做私家盤，兩大行勢均力敵。
為要有好成績，中記上個禮拜五起，動員二十幾人喺港島東同九龍東地鐵沿線派樓盤宣傳單張，由北角、鰂魚涌至觀塘、牛頭角都有員工駐紮，重準備咗成五十萬份單張派發，由下晝一點派到夜晚七點。聽講淨係上個禮拜六就派咗十幾萬份。
美聯都唔示弱，上個禮拜六都有派維景灣畔嘅宣傳單張，聽講一日都派咗十幾萬份。佢哋重派人喺太古、西灣河、藍田同九龍灣幾個地鐵站搵客。
估唔到將軍澳兩個大盤，拍埋兩間大代理行，展開嘅爭客戰都幾激烈。
𠵱家嘅新樓，大部份都包廚廁設備，同鋪地板，表面上用料一般都唔差，不過買家好多時都鍾意再做裝修，整到啱自己心水為止。蘭西同事嘅朋友最近買咗荔枝角盈暉臺單位，都有搵人裝修，將木地板換地磚，當裝修師傅起出地板後，發現地台有條裂痕，對戶主講可能有部份係空心。
戶主聽完梗係搵發展商理論，點知個職員問佢係咪搵人裝修單位後，就認定係裝修師傅搞成咁嘅。經過一輪爭拗後，最後發展商就搵專業人士上門調查，睇完之後就即刻應承同業主做修補，第二日就已經搞掂，認真神速。
買樓好多時都會遇到啲意想不到嘅問題，若果發現得遲，或者轉咗幾手之後先爆出嚟，到時就唔知係邊個嘅責任嘞！
夏利文管理嘅鑽石山星河明居，早前參加黃大仙區議會舉辦嘅2002/2003年度「黃大仙區優質大廈管理比賽」，喺樓齡15年內嘅私人樓宇組別中，榮獲季軍。該項比賽由多個政府部門，如消防局、環境保護署、警務處防止罪案組等代表評審。辛勞而煩瑣嘅管理工作，得到別人肯定，夏利文員工當然高興。
農曆新年期間，蘭西留喺屋企睇電視，好自然會留意同地產有關嘅廣告，發覺今年樓盤廣告少咗，另外物業管理公司廣告都冇乜，印象中好似只係得富城物業有喺賣電視廣告。蘭西查過，原來富城今年係第一次賣電視廣告，重係只落一個台㖭。咁嘅現象有乜微言大義，值得大家諗諗。
蘭西
電郵地址：
