近排我大口羅拉逛街嗰陣，都聽到好多人話想搵俄羅斯二人組合Tatu嘅唱片，男仔頭嘅Julia同長髮娃娃Lena雖然大sell同志意識，但最近佢哋居然俾人發現有男友，兩人照例否認之餘，重索性話自己係雙性戀者，係咪好嘢？
姑勿論係同志定雙性戀，近期Tatu已經成功衝出老家，人氣hit到去英美等地，佢哋喺外國一邊俾啲衞道之士鬧，一邊又有好多人鍾意，情況就好似早排嘅Eminem一樣。既然啲人話Tatu係壞女孩，佢哋就順勢喺新歌《NotGonnaGetMe》嘅MV入面，扮成一對逃犯，中途重大開殺戒！
Julia同Lena喺MV入面打低個貨車司機之後，即刻揸住架貨櫃車逃走，喺冰天雪地嘅公路上重不顧一切將修路工人撞到飛起！當然呢對同志姊妹花不時喺MV度眉來眼去，又鬼咁親密擁抱啦！去到MV後半part重玩迷離feel，佢哋除咗撞死埋「屬於過去」嘅自己之外，重嚟個無人駕駛，兩個人好happy咁企喺車頂迎風前進，認真出人意表！