上周五美股仍然唔得，驚住美伊局勢唔妥，經濟數據好都未能帶來支持，港股暫時都係有氣冇力，但距離9字大關唔遠，有力守住9字，下跌空間有限，唔適宜睇得太淡。
可以開始部署低吸Call輪。賭大市唔破9千，可以喺恒指挨近9千邊邊揸啲恒指Call輪，主角係9663同9723。9663今年6月夠鐘，現價9.8仙，溢價8.1%，槓桿率31.1倍；9723今年8月夠鐘，現價20.6仙，溢價4.5%，槓桿率12倍。兩隻輪比較，9663贏輸幅度都大好多，注碼宜細不宜大。
地產股中，長實（001）較弱，再跌可博反彈，穩陣計，咪揀啲溢價太高嘅Call輪，9671就比較適中，隻輪今年6月到期，現價31.5仙，溢價8.9%，槓桿率15.2倍，吼26-27仙入市。
公司輪市場靜到飛起，中旅公司輪763算係最多成交嗰隻，近排因為正股（308）有啲郁動，763交投多咗。隻輪6月埋單，現價17仙，溢價3%，槓桿率7.9倍，數據算係咁。中旅受惠於多咗過境及國內客運業務，個勢反覆向上，吼住正股調整時，趁低買啲763。中旅就快派成績表，有可能炒吓業績，對763有利。
章盛