港股大勢向淡，恒指9100大關若確認失守，跌勢將會再急。不過，炒股唔炒市，國企有概念，繼續吸引資金流入，表現強勢，後市仍可看好。
同基金界嘅朋友傾開，佢話呢輪都有啲嘢做，不過就唔係買藍籌，而係國企。佢哋啲客戶早輪不斷減債（係減持債券）而揸金（係揸住大筆現金），要同呢啲錢搵出路，在股市之中，國企無疑係幾穩陣嘅對象。
過去幾個月，芬佬一路有選擇性咁吸入國企，佢哋嘅「晒士」以億元計，國企貨源則有限，買得兩買，就搶咗上去。
全球經濟復甦似有還無，惟獨中國繼續有強勁增長，今年經濟增長估計逾8%，未來幾年亦會高企。熱錢無疑有好多出路，但中國市場肯定係其中一個主要目標，而國企就係熱門嘅選擇。QFII出台，人人都識計數，H股抵買過A股咁多，可以先飲頭啖湯。
雖然唔少人對中國來自生產能力擴大的增長有所憂慮，認為會導致產品供過於求和持續通縮，令企業盈利空間收窄，但美林證券發表研究報告，強調投資中國仍屬有利可圖。去年12月的經濟數據已好轉，包括消費物價指數按年跌幅為0.4%，比對上一個月的0.7%有改善，而生產物價指數亦重新顯示正增長，美林估計下半年通脹會重臨。
行業方面，美林看好汽車製造、化工、鋼鐵和紡織。另外，其他上游行業如礦產、基礎工業和高增值的中間加工業亦係理想選擇。
中國經濟高增長，全力建立大中華媒體集團的tom.com（8001），相信好快可以嘗到甜頭。過去兩年，tom不停收購，為未來盈利的增長而鋪路，家下EBITDA已大幅改善，而公司亦有信心今年可轉虧為盈。
tom進入收成期，股價就會有強勢表現，過去兩個月，tom大部份時間在2元至2.275元間上落，現時已再升越3條短期的平均線，向徘徊區頂部進發，整固完成後再升，目標指向2.75元。今次升勢，有利好條件支持，應可破位而上。
郭兆誠