投資開拍電影《行運超人》的Ba叔陳志達，前日暗寸中國星開拍的《百年好合》送贈券，票房失實。中國星主席向華強昨日反擊，指Ba叔是行外人，以及過於緊張票房以致語無倫次。Ba叔對此則表示強哥是好友亦是前輩，不過的確有很多電影票房篤數，但自己不得罪人，所以不會開名。
賀歲電影《百年好合》和《行運超人》的票房叮噹碼頭，暫時以《百》片領先。投資開拍《行運超人》的陳志達（Ba叔）前日在該片的祝捷會上，暗寸《百》片票房失實，還指摘某些電影公司廣發贈券，影響票房紀錄，又呼籲香港電影不要出埠取景，為香港製造就業機會。
對於Ba叔的言論，投資《百》片的中國星主席向華強昨日表示Ba叔第一次投資拍戲，才會過於緊張票房，以致語無倫次。
向華強昨日接受本報電話訪問時說：「我投資超過一百部戲，幾千萬又收過、百幾萬又收過，可以話係身經百戰，唔會介意票房、亦唔會同人爭票房冠軍。Ba叔第一次投資拍電影，過份緊張，所以先會語無倫次，間間公司都會有贈券啦，嘉禾自己都有派贈券，每間公司嘅制度都唔同。」
向華強又說：「我最奇怪係佢話唔好出埠拍電影，佢講得出呢番說話，證明佢係行外人。出外拍戲冇乜問題，都係用番香港嘅工作人員，出去拍外景同香港經濟根本就係兩碼子嘅事。Ba叔拍多幾套戲，就唔會咁緊張，冇人可以長勝，亦唔會長輸，呢啲嘢長做長有，鋪鋪咁緊張，點瞓覺呀！」
而Ba叔昨日就此事在電話中回應說：「強哥係我好朋友，佢係老前輩，我好尊重佢，我唔介意佢咁話我。我唔係話佢，係有好多電影篤數，但我唔會講係邊套，我唔得罪人嘅，係佢哋自己覺得我話佢啫！我的確係行外人，所以先會實地去考查，睇吓每間戲院嘅入座率，有啲有一百人睇，但六、七十張都係贈券，票房又好，所以先會咁講，唔係針對任何一個人。
「好似我投資《行》片咁，就係新加坡朋友嘅資金投資嚟香港。出去拍外景，話就話用番香港工作人員，但機票、食宿唔係錢嚟咩？香港人應該買香港貨。」
