近期，德國奧迪車廠繼早前推出嘅TT3.2Quattro之後，響日前又宣布推出新一代A3車系，相信勢必再一次成為一眾車迷嘅追捧目標。
從相片中可以睇到，新一代奧迪A3嘅造型設計，雖然依舊以揭背形式出現，但一組頭燈就用上全新編排，照明度較前高出不少外，再襯以新款鬼面罩，車首設計明顯較前來得更富魅力；另外，車尾部份亦設計得略帶有同廠A4車系嘅影子，雙出式排氣喉組合亦能讓你感受到引擎雄渾嘅咆哮聲呢！由於軸距及車身闊度，分別增加咗65mm（達2578mm）及30mm（達1765mm），故此車廂空間感明顯較前增強不少，加上承托力甚豐嘅座椅，乘坐亦見貼服舒適；而座椅嘅位置亦較舊有型號來得低矮，加上闊大車窗設計，從而提供有更佳嘅視野範圍，就連車廂設備配搭亦有修改，以迎合用家嘅要求。
然而，廠方為新車安排有多個引擎配搭，當中包括有1.6公升（102匹）及2.0公升FSI型號（150匹），響年中更會推出一台3.2公升V6偈（241匹），另外選擇3.2Quattro型號嘅用家，更可選配一套DSG波箱㖭！大家不妨拭目以待喇！