一連七場的個唱，有傳會為Eason帶來逾三百萬的歌酬，Eason講錢倒保留得很，只說對歌酬滿意，他說：「總之就滿意啦，𠵱家咁嘅市道，張惠妹、F4、周杰倫、陳小春、學友、克勤、阿倫，咁多演唱會，好難叫人攞三百八十蚊出嚟睇演唱會！」
Eason的唱片賣錢，現在的他已是千萬富翁，否則也不可能購買他那市值達二千二百萬元的大坑嘉崙臺豪宅，可是他說自己已將全副身家投資物業，連置夢想band房都得個恨字，他說：「我想有自己嘅band房，等啲朋友可以一齊上嚟jam歌，係咁簡單咋，講就易囉，我啲錢已經貢獻晒畀層樓。我唔使點買衫，車又唔多，一人一架（與徐濠縈）。」
Eason承認以前常衰多口，講錯話，他現已二十八歲，衰得多也會大得快，容易撞板的事盡量避免，謹言慎行，不再衝動，難怪他連添置一間band房也不敢胡來。他說：「我好衰格嘅，有時講嘢會講兩句寸吓人，但我都係想氣氛開心啫，𠵱家我都係有嘢直講，但學識有啲場合就有啲保留，唔好咁直，最多唔講嘢囉，啲人話我黑面，但起碼冇攻擊人，有時我做嘢有壓力，講嘢有啲浮誇，啲人就話我shortshort哋。
「我以前玩起上嚟都會好癲，不過嗰時我未係𠵱家嘅位置，大家冇咁注意，我有時唔知點樣紓緩自己嘅壓力，咪喺台上倒立，有時又夾下個胸，原來我都夾到條罅喎，啲人都會笑㗎，但有人又未必咁欣賞，咁我咪成日『瀨』！」
