要有答案，必須先有問題。
我舉例。如果想女人大大聲回答「好呀！」，你必須先發制人，細細聲問：「我送大大粒鑽石畀你好嗎？」
但是，鑑於女性越來越有個性，男人越來越無，這條「送鑽石畀你好嗎」的問題，未必一定得到你想要的答案。
不過，有一條問題，相當好用，百戰百勝，那就是：「咁又點？」
當某個極不順眼、你認為一無是處的傢伙，駕的汽車比你的名貴（你根本無車，你搭巴士，雖然巴士也是名牌Volvo），穿的比你光鮮，口氣比早上未刷牙的你還要大，令你看得心火盛，眼火爆，──這些時候，不妨平心靜氣問一問：「咁又點？」
你會發覺，答案只有一個，就是：「哈，冇乜點！」
對，根本完全冇乜點，就像小孩子畫的那些沒有乳頭的卡通人，乜點都冇。他有靚車，咁又點？他穿靚衫，咁又點？人家擁有的東西，會導致你生病生痔瘡嗎？不會。會令你短幾年命嗎？也不會。那人與你有關係嗎？根本完全無關。他今晨要是屙屎唔出，咁又點？與你有何相干？同樣道理，他駕靚車着靚衫兼口氣大，咁又點？會死人嗎？
人各有志，各有痔（或無），各有運，也各有所求。你所求的，可能根本不是靚車華衣和大口氣那些東西，可能你只愛做一些薪酬不是那麼多，但你認為是有意義，或舒服的事情。有無想過，你想要的，其實已經擁有了？人家擁有許多其他的，咁又點？那些是你想要的東西嗎？
這並不是阿Q精神，而是精精神神。
當然，我想擁有的，暫時還未到手。是以，看着那個我認為一無是處的麻甩佬，竟能和我心儀的靚師奶一起去買餸，難免眼火爆（起碼爆少少啦）。但，咁又點，會死人嗎？