我羅拉近日由一啲蛛絲馬迹之中發現，小妹妹上戶彩同森田剛之間嘅戀情，似乎已經畫上咗句號喇！因為俾人偷拍到佢哋拍拖之前，彩妹出席親任何公開場合，右手都會戴住一隻款式好普通嘅戒指，聽講嗰隻戒指就係森田哥送畀佢嘅。
但係近排彩妹出現時，隻手一係光脫脫，一係戴咗第二款戒指，加上啲日本報紙話彩妹被事務所下令同森田剛分手，我諗就係因為咁，佢先至除鬼咗隻戒指，費事觸景傷情。
不過彩妹都算積極，雖然豆芽夢碎，但佢剪個新髮型之後就全力投入工作。前幾日彩妹拍完廣告瞓咗兩粒鐘，晨早六點就去咗茨城縣嘅小型飛機場，拍佢嘅最新細碟《Hello》MV。日本𠵱家重好凍，當其他工作人員着住件大褸開工嘅時候，彩妹只得薄衫仔一件，但係佢一啲怨言都冇，喺飛機前擺出好多冷酷嘅甫士，果然係化悲憤為力量。
聽講呢首新歌《Hello》，原本唔會收入彩妹三月推出嘅處女大碟度，但因為佢對首歌情有獨鍾，喺彩妹堅持之下，唱片公司惟有就範。點之彩妹得寸進尺，重要將首歌做埋主打出細碟，結果又俾佢得逞，可能啲高層要彩妹離開情郎，算係畀番啲補償佢啩！