巴塞隆拿響聯賽幾乎要為降班護級，高層又起大變動，堂堂大球會突然好似香港嘅泡沫經濟咁爆破，都算令人意外！偏偏哨牙仔朗拿度就話：「我一早估到啦！」
季初朗拿度響國際米蘭鬧離隊，我求大俠就記得佢講過，話好想重投巴塞隆拿懷抱，搵番佢當年響巴塞隆拿嘅風光情懷。哨牙仔唔係真係咁善忘呀嘛？𠵱家又話一早已經睇到巴塞隆拿嘅管理好有問題，咁嗰陣又話想返去？慌佢唔係諗住取悅皇馬球迷至咁講咩！
希望今晚巴塞隆拿主場對住畢爾包就踢得爭氣啲，好似我哋波經名家青蛙仔預測咁，三比○大勝對手，順便剝埋哨牙仔棚牙！
車路士嘅意大利籍門將古迪仙尼住滿英格蘭七年，擁有英格蘭國籍，領隊雲尼阿里就勸佢不如諗諗改為代表英格蘭國家隊上陣，成為施文接班人。我求大俠都好贊成雲尼阿里嘅諗法，保方同埋托度一日響度，古迪仙尼嘅國腳夢都未必發得成！
羅馬最近連贏兩場，上周中意大利盃作客同市死敵拉素都贏埋，似乎有番個勢。講起呢場意大利盃，教練卡比路響開咗波之後過咗一陣，先至慢慢行去教練席入座；到下半場開波嗰陣又係咁，聽講佢原來迷信咁樣可以贏波，唔通呢個就係「羅馬復甦之謎」？
中巴大戰不設加時，不論戰果如何，淨係踢九十分鐘法定時間，即係話戲金達到一百二十五萬美元嘅巴西國家隊，響場上每分鐘都有一萬四千蚊美金落袋，認真和味！而中國新教頭阿里漢就話呢場唔會輸多過四球，相信外圍都可以睇呢個數開盤咯！
NBA明星賽聽日就開波，本報大部分名家都推介受讓嘅東岸，得深籃同員A要西岸，到時就要睇吓群眾力量勁啲，定係佢哋眼光獨到嘞；講番今朝早花式入樽同三分大賽，發現有間網上博彩公司有開冠軍盤，入樽賽大熱係「新仔」A史杜達米亞；衞冕的史杜亞高域就喺三分大賽大熱門，早起身嘅球迷可以玩番多少過吓癮。
紐卡素領隊卜比笠臣膺一月份英超最佳領隊，但係拎親呢個獎嘅，隊波就跟住走下坡，唔到你唔信邪！本報名家華度響個獎未公布前，就已經話今晚阿仙奴可以贏紐卡素，不過卜比笠臣適逢月中七十歲大壽，唔知可唔可以沖起，拆華度招牌呢？
逢周六、日見報