梁朝偉對女友劉嘉玲一直默默支持，但原來佢對阿媽都一樣咁重視，偉仔向來係孝順仔，有乜嘢都會預埋佢阿媽嗰份，就連佢近排揸嗰部平治C32T-AMG黑色旅行車，都係由佢同媽咪聯名嘅公司做車主，嘉玲反而就冇份。
偉仔部新車近日曝光，呢部黑色旅行車喺舊年七月買入，車價係七十一萬五千，登記車主係TeleVideoSystemCoLtd，而呢間公司嘅持有人係偉仔同佢媽咪，登記地址亦都係梁媽媽住緊嘅銀線灣住所。
偉仔喺錢銀方面一向大方，佢𠵱家同嘉玲住緊嘅梅道MayTower千萬豪宅，兩個人雖然同居咗咁多年，但層樓嘅業主登記就屬嘉玲個人所有，既然嘉玲都有樓揸手咯，偉仔亦唔待薄阿媽，一於同媽咪聯名買車。
台灣三人少女組合S.H.E日前喺台北西門町同歌迷見面，佢哋重黐上鬍鬚，着住福、祿、壽嘅古裝衫，向在場fans大派糖果。
S.H.E話扮福、祿、壽其實係有意思㗎，Selina話自己係三個人之中最擦得，呢啲係種福氣，由佢扮「阿福」就啱；Ella就話自己一生忙碌，做「阿祿」最好；而Hebe就話佢注重健康，佢扮「壽仔」就至啱。
趙雅芝噚日喺鑽石山荷里活廣場出席營養食品「蓓姿康」嘅廣告首映會，並宣布成為呢個產品嘅代言人，為期兩年；由於產品係標榜專為四十五歲以上嘅女士而設，但佢話一啲都唔介意將自己嘅年齡公開，重讚話男同女都可以飲，佢話自從飲咗之後，隻手無以前咁易冰凍咁話。
麥浚龍（Juno）日前去咗加拿大，不停做宣傳，佢日前就喺一間卡拉OK舉行簽唱會，Juno當日好識做咁帶定好多禮物去送畀歌迷，而主辦單位亦準備咗個蛋糕畀Juno，話要祝佢事業一帆風順喎。Juno話佢以前都喺加拿大生活過一段時間，覺得嗰度啲人好親切，而佢最開心嘅係知道當地都有好多人支持佢喎！
馬浚偉俾人話佢同陳豪爭上位，爭住上節目《紅星會》，又有雜誌話佢搭上蓋鳴暉。
馬仔噚日去咗文化中心出席新城一個記者會，佢一路稱呼陳豪做大哥，話佢兩個感情好好，否認自己有爭過《紅星會》個節目嚟做，佢話：「我好嬲呀，我唔知係我得罪人定係我紅，唔好將我同我身邊嘅人寫到古靈精怪啦。」
前晚EMI唱片喺尖沙嘴搞春茗，自從鄭中基老竇鄭東漢入主EMI後，以佢同黃柏高嘅關係，EMI同金牌經理人公司幾乎一家親。前晚除咗黃柏高同鄭東漢外，鄭中基、李彩樺、Cookies、何韻詩、梁漢文等都有出席。
鄭東漢重攞住結他自彈自唱娛賓，唱完後佢個仔鄭中基亦技癢，走上台表演打鼓。鄭東漢同黃柏高重一人出咗萬幾蚊畀大家抽獎㖭。
