第一次出外公幹，先知道做記者嘅辛苦。抵埗一去到酒店就話之前嘅預約竟然取消咗，差啲搞到要瞓街。到咗今日，本來已經安排好行程，但NBA臨時又話有個國際球星專訪，結果今日又無時間去Shopping。好彩NBA有個禮物包（圖1）送畀傳媒，包括明星賽衞衣、鷹隊吉祥物，同埋NBALego。都幾正㗎！
今次明星賽，可以話令到亞特蘭大市「全民皆兵」，每個人都努力搵遊客錢（當係水魚㩒嗰隻）。先係我住嘅酒店由八十蚊美金一晚暴漲至二百二十蚊；諗住食「老麥」慳番多少，結果又因為要加三蚊換隻明星賽汽水杯（圖2），而要成八蚊先可以食個巨無霸餐。
講起巨無霸，呢邊雖然得攝氏零下兩、三度；但係啲人都好「壯」，我每晚去幫襯嘅Kinko's（提供收費上網電腦，成個市中心得一間）隔兩條街，有間叫Level3嘅Disco；可能明星賽關係好多人幫襯，迫到個場水洩不通。企喺門口嘅「惹火女郎」大多係短裙一條，佢哋最少都同我一樣高，但係對腳就同我條腰咁粗，望到都令我凍多幾成；真係多得佢哋唔少！
本報記者雷海彬亞特蘭大傳真