第一夫人怎麼辦 - 左丁山

第一夫人怎麼辦 - 左丁山

坊間稱為A1的夫人高喊一句:「信我啦!」繼Complain,complain,complain之後,成為城中佳話,有人拍掌,有人皺晒眉頭。夫人久不久就語出驚人,究竟會唔會替老公增加民望,還是拉低老公嘅民意評分呢?各有意見,不便細表。
公關大姐大就認為唔多妥,佢從公關角度考慮,認為夫人應效法彭定康、衞奕信、尤德、麥理浩幾位前港督嘅另一半,即係靜靜地站在幕後,避免公開發言,不評論本港時事。如果認為英國佬冇乜好學,不妨參考國家領導人吖,你幾時見過江澤民夫人、朱鎔基夫人公開講Complain,complain,complain?

大姐大又認為夫人想做嘢,不妨照抄喬治布殊總統夫人勞拉。
布殊在歐洲人、美國自由派知識分子眼中,胸無點墨,面目可憎,禮儀不周,正是德州鄉下佬一名。勞拉入主白宮之後,定期搞讀書會、小音樂會,請美國各州(不分膚色貧富族裔)嘅騷人墨客、鄉謠歌星,到白宮演講、演唱、誦詩、談文說藝,聽眾對象就係華盛頓附近地區嘅大中學生、公僕家屬,將美國不同文化帶進白宮,與普通人交流。
勞拉嘅做法,連睇唔起布殊嘅作家都受感動,肯到白宮作客。勞拉好少好少請嘅客人就係克林頓希拉莉嘅至愛——荷李活大明星、導演、歌星,所以芭芭拉史翠珊高舉旗號反布殊,但美國的普通人民(東西部、南部各州人民)就擁護布殊。勞拉只在幕後活動,不公開宣傳,更絕不月旦時事,真係幫到老公㗎!