譚詠麟（阿倫）早前在演唱會上，以棟篤笑形式揶揄余文樂和陳冠希撞膊事件，並指陳冠希事後稱「冇事」是自欺欺人，此事引來黃秋生不滿，他指阿倫多事，更暗寸對方年紀大，秋生說：「叫佢得閒做吓facial啦，正一得閒冇屎屙！」
早前樂壇校長譚詠麟和李克勤在演唱會上，借余文樂和陳冠希撞膊事件做話題，阿倫直斥陳冠希與余文樂衝突後稱「冇事」是自欺欺人，此事引來黃秋生不滿。
黃秋生拍攝《無間道》時與陳冠希和余文樂合作，其後亦會繼續合作拍攝《無間道前傳》，昨日秋生於上環拍攝由香港電台與警務處合作的劇集《執法群英》時，直言阿倫多事，秋生說：「叫佢得閒做吓facial啦，正一得閒冇屎屙，叫佢講少句，出少句聲，啲後生仔都話冇嘢，佢幾十歲要講就同番我呢啲幾十歲嘅講，唔好搞啲後生仔。」
秋生於《執》劇中飾演拆彈處理主任，負責指揮拆彈助理控制拆彈機械人「威霸龍」，用水炮引爆現場懷疑爆炸品。秋生穿上共重約六十二磅的拆彈裝束，檢查已引爆的爆炸品。現場有近十名的現役警員協助拍攝，當引爆爆炸品前，警員將部份太平山街封鎖，禁止市民走近。
問秋生是否首次與警員合作？秋生說：「都算係第一次，咁大規模又有咁多部門配合。今次唔止覺得有意義，重好有質感。我拍呢套劇之前要去爆炸品處理課接受訓練，學咗處理唔同炸彈嘅過程，重要學埋佢哋面對炸彈嘅冷靜同客觀。」
此外，當拆彈助理替秋生穿上防爆褲時，秋生發現重要部位沒有受保護，秋生即時問現場真正的炸彈處理主任：「冇啫啫位咩？炸到咪好慘！」引來哄堂大笑。
採訪：汪正文
攝影：仇志德
