陳奕迅（Eason）本月中將在紅館連開七場演唱會，其女友徐濠縈會擔任其形象設計，在舞台上跟男友共度七年之癢的關口，但Eason自謙身家全用來養豪宅，想癢也癢不起。目前，事業對他最重要，他很贊成樂壇有良性競爭，並表示會與許志安和陳小春決戰到底。
惡性競爭好老土
陳奕迅本月十六日開始其紅館演唱會，個唱舉行前也有不少風雨，先傳他的個唱是頂替老友謝霆鋒的檔期，繼而又傳其個唱銷情不及譚詠麟和李克勤的「左麟右李演唱會」。
Eason對此說：「係唔係頂霆鋒個期都冇所謂，反而我有問過公司啲飛賣成點，佢哋話我個演唱會啲飛去得好，咁『左麟右李』又係賣得好喎，我都好想睇㗎，啲人成日話我同克勤由年頭鬥到年尾，良性競爭啫，我同安仔（許志安）、小春都鍊緊㗎，𠵱家冇暗鬥。樂壇已經唔係蓬勃，上TVB重要你唱三分幾鐘，我唱兩分幾就唔得，好老土囉。劉德華講得啱，歌手之間唔應該有芥蒂。」
而Eason的演唱會舞台，以一個廢墟做主題，花費百萬製作的舞台會搭建成凹凸不平的月球表面，屆時大家會見到太空人、「金剛」像，逾二十部的電視機和霓虹光管。而扮演地球唯一生還者的Eason，憑歌自娛令大地回復生機，他會唱出春夏秋冬四季的心情，也會唱別人的歌，包括譚詠麟的《一生中最愛》、陳百強的《不再問究竟》、羅文的《幾許風雨》等，Eason還會唱意大利歌劇揭開序幕。
Eason今次大唱獨腳戲，沒有邀請嘉賓，他覺得演唱會應以歌會友，最緊要是夠氣唱歌，他不需要騷六嚿腹肌，所以懶得減肥。
Eason說：「我會練氣，平日冇運動，我會跑步，做situp，我唔想啲焦點落喺我嘅身形上，我如果着短褲都好震撼㗎，但啲人就唔會留意我嘅歌，只係留意我對腳，我成二十三吋大髀，肯定粗過孫燕姿條腰。」
撰文：朱芷瑩
攝影：陳偉權
