唔知係唔係大戶過完年後向散戶派利是，忽然間有好多錢都走晒去炒細價股，國企股亦都升到巴巴聲。不過，有行家同伏勝講，國企股始終都係國企股，炒完一輪之後一定要識得落車，千祈唔好太貪心，免得貪字得個貧。
雖然話國企唔係長炒長有，不過一啲有國內概念嘅股份，就仍然好得散戶歡心，話說早前被唱到就賣盤嘅盈科保險（065）喺幾番掙扎之後，終於得到北大人嘅首肯，批准佢哋喺國內嘅營業批文。知情者重話，佢哋有好大機會喺今年年底前，會以廣州作為踏進神州嘅第一步，到時只要能夠打進國內市場，要有優良嘅成績絕對唔難，所以該行家叫伏勝買番啲嚟坐坐，相信回報唔錯。
雖然香港嘅經濟已經衰咗5年幾，前景暫時重係一片茫然，不過做女人生意嘅行業就愈做愈紅，皆因呢個係中國人嘅特性，冇錢都要打扮得身光頸靚，又或者係啲女士們應董伯嘅呼籲，喺經濟困難嘅時候仍然要投資增值（按：投資喺自己身上，增加自己嘅存在價值），所以見到啲美容院同賣化妝品嘅舖頭通常都迫滿人，尤其係莎莎（178）。
睇番莎莎上半年業績，股東應佔溢利已經好轉，雖然隻股喺過去一周已經由7毫半升到最高9毫子，但有行家話，遲啲本港進一步放寬國內遊客來港，一定會好過𠵱家，所以一定要吼實呢隻股，重話可以炒到去1蚊水平。不過，千祈咪心急，照伏勝嘅炒股經驗嚟睇，若果今個禮拜隻股跌番落去8毫半嘅話，不妨執番啲，風險細啲之外，上升空間亦會較大。
伏勝