年初三跑馬，大熱門贏八W一Q一P（即八場第一，一場第二，一場第三），上名率之高，打破紀錄，正因連場開熱門，散戶贏大錢好難，執餐晚飯就算容易，最得益嘅係蔡約翰、告東尼兩個馬房（共贏八場）嘅大馬主，大注收錢，勝過收息好多。
因猛開熱門，冇乜諗頭，與馬主P傾開偈，聽爆呔故事。馬主P話旅遊界老行尊Y先生有一隻中班準繩馬，現已退役，服役時贏馬唔易，入三三四四攞獎金就經常有。一次喺跑馬地出賽，配牌仔，練馬師話冇乜機會，名嘴W對Y先生講：「你隻馬返嚟，叻過尾三，我請飲茶。」馬主Y自然冇乜癮，牌仔騎師T（現已退役）上馬之前，馬主Y對佢講：「唔該你搏命跑尾四，等我有番啲面！」既然如此，在場成班老友都唔落注，其中一位N先生話：「我老婆畀一千蚊我，尊重Y先生，買五百蚊W、五百蚊P捧場。咁講法，不如留番一千蚊嚟消夜好過。」
閘門一開，牌仔T彈出，沿欄推進，轉入直路之時，前領馬外閃，留番條路，於是牌仔T搏命騎，外閃馬失咗幾個馬位，糾正走勢後再追，到咗終點咯。馬主Y隻馬爆出六十倍大冷門，佢同班老友就玄壇咁面。拉頭馬之時，馬主Y下令所有人笑到四萬咁口，以示高興。N先生就杰咯，老婆睇電視，見到佢哋拉頭馬猛咁笑，自己亦歡喜到跳起，因畀一千蚊老公下注，可收回三萬幾銀也，點知老公冇買到，咁就唔知點收科矣。