港股反覆，恒指埋單仍有進帳24點，但大藍籌變化則非常個別，長實（001）較弱，收47.90元，唔見90仙，啲長實窩輪自然有大變化。
長實Put輪9567做咗龍虎榜阿2，收15.3仙，升21%，有36球易手。
隻輪4月夠鐘，溢價9.2%，槓桿率31.3倍。高價追唔過，到期之時，正股要跌到低過45元隻輪先有得剩，要跌到43.47元隻輪先至可以值番𠵱家15.3仙個價。長實𠵱家距離43.47元重有4.43元，相信個市就算差，長實都唔易見呢個低位。
假如長實再低啲，博反彈，反為可以吼吓啲Call輪，有兩隻對象，就係9671同9680。兩隻輪分別有溢價8.9%同10%，如果博反彈，都要速戰速決，坐盤坐得耐好易輸溢價。
電訊股仍然疲弱，電盈（008）收5.95元，跌10仙。電盈曾經有意收購大東，對方未應承。電盈個樣似乎重想搞嘢，發新股唔易，收購用現金又加重負債，又易惹人推測將來會否做伸手牌，暫時咪睇呢隻藍籌，啲電盈Call輪唔使諗住。要博，則揀啲Put輪埋手，唯一可以諗嘅係9652，6月到期，現價38仙，溢價2.5%，槓桿率3.1倍，冇乜爆炸力。
章盛