郭富城喺三月二十三號會喺馬來西亞出席《保時捷CARRERACUPASIA-2003年賽事之世界一級方程式錦標賽》，城城噚日特別抽空去大馬試車，但因為唔多適應新場地，加上唔慣揸左呔車，一度因為入錯波，搞到跑車失靈要修理，冇辦法順利試車。
城城今次係以嘉賓身份出席賽事，佢話無論如何都會去完成呢場賽事，主辦當局安排咗一架全新嘅保時捷911GT3畀佢參賽。城城接受當地傳媒訪問時話：「今天試車不太順利，因為發生咗很多問題，之前沒有見過這輛車，所以比較陌生，要適應，但今天晚上我就要回香港，可能要到三月份出賽前才有機會試車，肴望到時的狀態可以應付這場賽事。」
城城雖然試車唔順利，但據知佢喺之前試跑嘅時候，排名第六，成績不俗，佢自己就希望正式比賽嗰陣，可以有排名第八或者第十嘅理想成績。
陳曉東噚日喺新加坡，同《百分百感覺2》其中一名女角張玉華去大學宣傳呢套劇，喺活動上面，分別有五男五女影迷，同佢一齊食咗個好浪漫嘅晚餐。問到東東會唔會同歌迷拍拖，佢諗咗一陣話：「我諗，自己同邊個都有機會拍拖，我成日都諗有冇可能、有冇機會，不過好多歌迷示愛，但始終都未能算係拍拖。」
蔡少芬噚日返將軍澳電視城為無綫新劇《陀槍師姐IV》開工，蔡少芬話最近忙緊拍劇，不過遲啲會有個新嘗試，就係做《無綫兒歌金曲頒獎禮》嘅主持。佢話：「雖然我唔係好口齒伶俐，但我窒人嗰陣就好高超；不過，現場直播要對住鏡頭就會比較緊張，不過我都好有信心去做好佢嘅，最緊要係盡咗力！」
黃任中因為欠稅，俾台灣政府送咗去士林看守所，但佢因為心肌梗塞同氣喘等問題，喺上個月二十九號晚入咗去台北縣立板橋醫院就醫，醫生觀察咗六個鐘之後，因為佢病情穩定咗，已經送返去士林看守所；不過，佢喺第二日又再因為心臟病送咗去板橋亞東醫院，𠵱家病情穩定。
台灣人氣組合F4喺紐約時間周六會喺康湼狄格州金神大賭場舉行兩場演唱會，早幾日佢哋喺紐約舉行記者會，有十幾間中文媒體嘅記者去採訪，大會規定記者只可以問有關演唱會嘅問題，又限制記者坐嘅位置，兼且只係畀佢哋十幾分鐘時間做訪問，搞到當地嘅記者不滿，話F4扮大牌。
