港股終於「反彈」，恒指收報9150，升24點咁大把，同趙飛雲心目中嘅反彈相差好遠。除咗電盈（008）嘅「兩個版本通告」醜聞外，基本上冇乜消息入市，昨市走勢以技術為主導，早段期指挾淡，由低位殺番高百點，但午後又陷窄幅上落。
恒指昨日最高彈至9163，剛好觸及頭肩頂頸線，可能係「後抽」，跟住就要大跌。不過，趙飛雲傾向相信恒指重有一兩百點，甚至兩三百點嘅反彈，先至再散過。
大市雖然稍為回升，但重磅藍籌超賣嘅情況未見有太大改善，中移動（941）嘅9RSI進一步降至18.7，滙豐（005）則見底背馳，有利短線反彈。當然，超賣可以再超賣，背馳股價可以一樣照跌，但見到咁嘅訊號，做淡一定要提高警覺。
睇番外圍市況，美股睇嚟亦有短線反彈條件。首先美元暫見喘定，金價向下調整，美股亦有可能做番好啲。從技術上嚟睇，杜指同標普500指數嘅9RSI，亦與股價背馳，短線出現反彈，並不出奇。
美國昨晚公布1月份就業數據，執筆時尚未收到消息。如果數據較預期好，則市場的注意力可能會轉投經濟因素上（畢竟戰爭陰影呢個藉口已經炒咗好耐），將美股推高多少。當然，如果數據差劣，咁好友就冇眼睇矣。
趙飛雲都係維持原先策略，見大市出現較大反彈之時先至做淡。倉內剩低嘅意科（943），早段有調整，但午後掃番上去，成交增至1400萬股，走勢對辦，續揸可也。
趙飛雲