荷李活女星雲露娜維達（WinonaRyder），前年喺比華利山著名百貨公司涉嫌偷竊，被法院判罪名成立，需要履行四百八十小時社會服務令。原來雲露娜喺上月已經開始做服務工作，而佢嘅義工look，日前終於曝光！
話說雲露娜喺兩星期前，為洛杉磯一個名叫「CityOfHope」嘅慈善團體做義工，呢個團體專係替絕症病人服務，唔少荷李活名人每年都捐錢贊助呢個組織，難怪雲露娜對佢哋特別有歸屬感。
不過當我羅拉見到雲露娜俾攝影師影到佢洗盡鉛華嘅清潔女工打扮，重一臉倦容咁，一定唔多好受。好彩我聽聞歎慣玩慣嘅雲露娜，其實唔多介意人哋見到佢勞役嘅樣，有時佢重着住件開工衫去附近嘅名店購物，睇嚟雲露娜對自己嘅工作好有滿足感。