雖然小初同埋成班老友甚少買創業板股，但經紀黃噚日就叫小初留意隻利亞零售（8052），話隻股在早前被大股東大手配售減持後，股價仍然企得異常硬淨，加上多間外資證券行頻出報告推介，所以覺得有機會都未定。
利亞上月由大股東以每股2元，向基金配售9342.2萬股，足足佔利亞已發行股數14%。
配售代理售後服務果然到家，利亞股價一直企硬，好似噚日咁，就守在2.025元，由於成手貨值成1.87億元咁勁抽，所以經紀黃先至覺得隻股股價守得住，有關人等真係厲害。
經紀黃話，基金鍾意利亞，當然唔係覺得香港的OK便利店OK，而係鍾意佢有大陸零售概念，尤其係公司打算今年大展拳腳，好似舊年吉之島（984）就因為同一概念，令股價由唔夠2元，炒到上去接近5元水平。
但小初唯一唔鍾意，就係隻股始終係創業板股，加上成交異常稀疏，怕買咗走唔到喎。
慕容小初